Ūtfæreldes Lēoþ
Hƿæt! Ƿe feor and neah ȝefriȝen habað
ofer middanȝeard Moyses domas,
ƿræclico ƿordriht, ƿera cneorissum,--
in uprodor eadiȝra ȝehƿam
5
æfter bealusiðe bote lifes,
lifiȝendra ȝehƿam lanȝsumne ræd,--
hæleðum secȝan. Ȝehyre se ðe ƿille!
þone on ƿestenne ƿeroda drihten,
soðfæst cyninȝ, mid his sylfes miht
10
ȝeƿyrðode, and him ƿundra fela,
ece alƿalda, in æht forȝeaf.
He ƿæs leof ȝode, leoda aldor,
horsc and hreðerȝleaƿ, herȝes ƿisa,
freom folctoȝa. Faraones cyn,
15
ȝodes andsacan, ȝyrdƿite band,
þær him ȝesealde siȝora ƿaldend,
modȝum maȝoræsƿan, his maȝa feorh,
onƿist eðles, Abrahames sunum.
Heah ƿæs þæt handlean and him hold frea,
20
ȝesealde ƿæpna ȝeƿeald ƿið ƿraðra ȝryre,
ofercom mid þy campe cneomaȝa fela,
feonda folcriht. ða ƿæs forma sið
þæt hine ƿeroda ȝod ƿordum næȝde,
þær he him ȝesæȝde soðƿundra fela,
25
hu þas ƿoruld ƿorhte ƿitiȝ drihten,
eorðan ymbhƿyrft and uprodor,
ȝesette siȝerice, and his sylfes naman,
ðone yldo bearn ær ne cuðon,
frod fædera cyn, þeah hie fela ƿiston.
30
Hæfde he þa ȝesƿiðed soðum cræftum
and ȝeƿurðodne ƿerodes aldor,
Faraones feond, on forðƿeȝas.
þa ƿæs inȝere ealdum ƿitum
deaðe ȝedrenced drihtfolca mæst;
35
hordƿearda hryre heaf ƿæs ȝeniƿad,
sƿæfon seledreamas, since berofene.
Hæfde mansceaðan æt middere niht
frecne ȝefylled, frumbearna fela,
abrocene burhƿeardas. Bana ƿide scrað,
40
lað leodhata, land drysmyde
deadra hræƿum, duȝoð forð ȝeƿat,
ƿop ƿæs ƿide, ƿorulddreama lyt.
Ƿæron hleahtorsmiðum handa belocene,
alyfed laðsið leode ȝretan;
45
folc ferende, feond ƿæs bereafod,
herȝas on helle. Heofunȝ þider becom,
druron deofolȝyld. Dæȝ ƿæs mære
ofer middanȝeard þa seo menȝeo for.
Sƿa þæs fæsten dreah fela missera,
50
ealdƿeriȝe, Eȝypta folc,
þæs þe hie ƿideferð ƿyrnan þohton
Moyses maȝum, ȝif hie metod lete,
on lanȝne lust leofes siðes.
Fyrd ƿæs ȝefysed, from se ðe lædde,
55
modiȝ maȝoræsƿa, mæȝburh heora.
Oferfor he mid þy folce fæstena ƿorn,
land and leodƿeard laðra manna,
enȝe anpaðas, uncuð ȝelad,
oðþæt hie on Ȝuðmyrce ȝearƿe bæron,
60
(ƿæron land heora lyfthelme beþeaht),
mearchofu morheald. Moyses ofer þa,
fela meorinȝa, fyrde ȝelædde.
Heht þa ymb tƿa niht tirfæste hæleð,
siððan hie feondum oðfaren hæfdon,
65
ymbƿiciȝean ƿerodes bearhtme
mid ælfere æthanes byriȝ,
mæȝnes mæste mearclandum on.
Nearƿe ȝenyddon on norðƿeȝas,
ƿiston him be suðan Siȝelƿara land,
70
forbærned burhhleoðu, brune leode,
hatum heofoncolum. þær haliȝ ȝod
ƿið færbryne folc ȝescylde,
bælce oferbrædde byrnendne heofon,
halȝan nette hatƿendne lyft.
75
Hæfde ƿederƿolcen ƿidum fæðmum
eorðan and uprodor efne ȝedæled,
lædde leodƿerod, liȝfyr adranc,
hate heofontorht. Hæleð ƿafedon,
drihta ȝedrymost. Dæȝsceades hleo
80
ƿand ofer ƿolcnum; hæfde ƿitiȝ ȝod
sunnan siðfæt seȝle ofertolden,
sƿa þa mæstrapas men ne cuðon,
ne ða seȝlrode ȝeseon meahton,
eorðbuende ealle cræfte,
85
hu afæstnod ƿæs feldhusa mæst,
siððan he mid ƿuldre ȝeƿeorðode
þeodenholde. þa ƿæs þridda ƿic
folce to frofre. Fyrd eall ȝeseah
hu þær hlifedon haliȝe seȝlas,
90
lyftƿundor leoht; leode onȝeton,
duȝoð Israhela, þæt þær drihten cƿom
ƿeroda drihten, ƿicsteal metan.
Him beforan foran fyr and ƿolcen
in beorhtrodor, beamas tƿeȝen,
95
þara æȝhƿæðer efnȝedælde
heahþeȝnunȝa haliȝes ȝastes,
deormodra sið daȝum and nihtum.
þa ic on morȝen ȝefræȝn modes rofan
hebban herebyman hludan stefnum,
100
ƿuldres ƿoman. Ƿerod eall aras,
modiȝra mæȝen, sƿa him Moyses bebead,
mære maȝoræsƿa, metodes folce,
fus fyrdȝetrum. Forð ȝesaƿon
lifes latþeoƿ lifƿeȝ metan;
105
sƿeȝl siðe ƿeold, sæmen æfter
foron flodƿeȝe. Folc ƿæs on salum,
hlud herȝes cyrm. Heofonbeacen astah
æfena ȝehƿam, oðer ƿundor,
syllic æfter sunnan setlrade beheold,
110
ofer leodƿerum liȝe scinan,
byrnende beam. Blace stodon
ofer sceotendum scire leoman;
scinon scyldhreoðan, sceado sƿiðredon,
neoƿle nihtscuƿan neah ne mihton
115
heolstor ahydan; heofoncandel barn.
Niƿe nihtƿeard nyde sceolde
ƿician ofer ƿeredum, þy læs him ƿestenȝryre,
har hæðbroȝa, holmeȝum ƿederum
on ferclamme ferhð ȝetƿæfde.
120
Hæfde foreȝenȝa fyrene loccas,
blace beamas; belleȝsan hƿeop
in þam hereþreate, hatan liȝe,
þæt he on ƿestenne ƿerod forbærnde,
nymðe hie modhƿate Moyses hyrde.
125
Scean scir ƿerod, scyldas lixton,
ȝesaƿon randƿiȝan rihte stræte,
seȝn ofer sƿeoton, oðþæt sæfæsten
landes æt ende leodmæȝne forstod,
fus on forðƿeȝ. Fyrdƿic aras;
130
ƿyrpton hie ƿeriȝe, ƿiste ȝenæȝdon
modiȝe meteþeȝnas, hyra mæȝen beton.
Bræddon æfter beorȝum, siððan byme sanȝ,
flotan feldhusum. þa ƿæs feorðe ƿic,
randƿiȝena ræst, be þan readan sæ.
135
ðær on fyrd hyra færspell becƿom,
oht inlende. Eȝsan stodan,
ƿælȝryre ƿeroda; ƿræcmon ȝebad
laðne lastƿeard, se ðe him lanȝe ær
eðelleasum onnied ȝescraf,
140
ƿean ƿitum fæst. Ƿære ne ȝymdon,
ðeah þe se yldra cyninȝ ær ȝe...
þa ƿearð yrfeƿeard inȝefolca,
manna æfter maðmum, þæt he sƿa miceles ȝeðah.
Ealles þæs forȝeton siððan ȝrame ƿurdon
145
Eȝypta cyn ymbe antƿiȝ;
ða heo his mæȝƿinum morðor fremedon,
ƿroht berenedon, ƿære fræton.
Ƿæron heaðoƿylmas heortan ȝetenȝe,
mihtmod ƿera; manum treoƿum
150
ƿoldon hie þæt feorhlean facne ȝyldan,
þætte hie þæt dæȝƿeorc dreore ȝebohte,
Moyses leode, þær him mihtiȝ ȝod
on ðam spildsiðe spede forȝefe.
þa him eorla mod ortryƿe ƿearð
155
siððan hie ȝesaƿon of suðƿeȝum
fyrd Faraonis forð onȝanȝan,
oferholt ƿeȝan, eored lixan,
(ȝaras trymedon, ȝuð hƿearfode,
blicon bordhreoðan, byman sunȝon),
160
þufas þunian, þeod mearc tredan,
on hƿæl
Hreopon herefuȝolas, hilde ȝrædiȝe,
deaƿiȝfeðere ofer drihtneum,
ƿonn ƿælceaseȝa. Ƿulfas sunȝon
165
atol æfenleoð ætes on ƿenan,
carleasan deor, cƿyldrof beodan
on laðra last leodmæȝnes fyl.
Hreopon mearcƿeardas middum nihtum,
fleah fæȝe ȝast, folc ƿæs ȝehæȝed.
170
Hƿilum of þam ƿerode ƿlance þeȝnas
mæton milpaðas meara boȝum.
Him þær seȝncyninȝ ƿið þone seȝn foran,
manna þenȝel, mearcþreate rad;
ȝuðƿeard ȝumena ȝrimhelm ȝespeon,
175
cyninȝ cinberȝe, (cumbol lixton),
ƿiȝes on ƿenum, ƿælhlencan sceoc,
het his hereciste healdan ȝeorne
fæst fyrdȝetrum. Freond onseȝon
laðum eaȝan landmanna cyme.
180
Ymb hine ƿæȝon ƿiȝend unforhte,
hare heoroƿulfas hilde ȝretton,
þurstiȝe þræcƿiȝes, þeodenholde.
Hæfde him alesen leoda duȝeðe
tireadiȝra tƿa þusendo,
185
þæt ƿæron cyninȝas and cneoƿmaȝas,
on þæt eade riht, æðelum deore.
Forðon anra ȝehƿilc ut alædde
ƿæpnedcynnes, ƿiȝan æȝhƿilcne
þara þe he on ðam fyrste findan mihte.
190
Ƿæron inȝemen ealle ætȝædere,
cyninȝas on corðre. Cuð oft ȝebad
horn on heape to hƿæs hæȝstealdmen,
ȝuðþreat ȝumena, ȝearƿe bæron.
Sƿa þær eorp ƿerod, ecan læddon,
195
lað æfter laðum, leodmæȝnes ƿorn,
þusendmælum; þider ƿæron fuse.
Hæfdon hie ȝemynted to þam mæȝenheapum
to þam ærdæȝe Israhela cynn
billum abreotan on hyra broðorȝyld.
200
Forþon ƿæs in ƿicum ƿop up ahafen,
atol æfenleoð, eȝesan stodon,
ƿeredon ƿælnet, þa se ƿoma cƿom.
Fluȝon frecne spel, feond ƿæs anmod,
ƿerud ƿæs ƿiȝblac, oðþæt ƿlance forsceaf
205
mihtiȝ enȝel, se ða meniȝeo beheold,
þæt þær ȝelaðe mid him lenȝ ne mihton
ȝeseon tosomne; sið ƿæs ȝedæled.
Hæfde nydfara nihtlanȝne fyrst,
þeah ðe him on healfa ȝehƿam hettend seomedon,
210
mæȝen oððe merestream; nahton maran hƿyrft.
Ƿæron orƿenan eðelrihtes,
sæton æfter beorȝum in blacum reafum,
ƿean on ƿenum; ƿæccende bad
eall seo sibȝedriht somod ætȝædere
215
maran mæȝenes, oð Moyses bebead
eorlas on uhttid ærnum bemum
folc somniȝean, frecan arisan,
habban heora hlencan, hycȝan on ellen,
beran beorht searo, beacnum ciȝean
220
sƿeot sande near. Snelle ȝemundon
ƿeardas ƿiȝleoð, ƿerod ƿæs ȝefysed,
brudon ofer burȝum, (byman ȝehyrdon),
flotan feldhusum, fyrd ƿæs on ofste.
Siððan hie ȝetealdon ƿið þam teonhete
225
on þam forðherȝe feðan tƿelfe
moderofra; mæȝen ƿæs onhrered.
Ƿæs on anra ȝehƿam æðelan cynnes
alesen under lindum leoda duȝuðe
on folcȝetæl fiftiȝ cista;
230
hæfde cista ȝehƿilc cuðes ƿerodes
ȝarberendra, ȝuðfremmendra,
X hund ȝeteled, tireadiȝra.
þæt ƿæs ƿiȝlic ƿerod; ƿace ne ȝretton
in þæt rincȝetæl ræsƿan herȝes,
235
þa þe for ȝeoȝuðe ȝyt ne mihton
under bordhreoðan breostnet ƿera
ƿið flane feond folmum ƿeriȝean,
ne him bealubenne ȝebiden hæfdon
ofer linde læriȝ, licƿunde sƿor,
240
ȝylppleȝan ȝares. Ȝamele ne moston,
hare heaðorincas, hilde onþeon,
ȝif him modheapum mæȝen sƿiðrade,
ac hie be ƿæstmum on ƿiȝ curon,
hu in leodscipe læstan ƿolde
245
mod mid aran, eac þan mæȝnes cræft,
ȝarbeames fenȝ.
þa ƿæs handrofra here ætȝædere,
fus forðƿeȝas. Fana up ȝerad,
beama beorhtost; bidon ealle þa ȝen
250
hƿonne siðboda sæstreamum neah
leoht ofer lindum lyftedoras bræc.
Ahleop þa for hæleðum hildecalla,
bald beohata, bord up ahof,
heht þa folctoȝan fyrde ȝestillan,
255
þenden modiȝes meðel moniȝe ȝehyrdon.
Ƿolde reordiȝean rices hyrde
ofer hereciste halȝan stefne,
ƿerodes ƿisa ƿurðmyndum spræc:
"Ne beoð ȝe þy forhtran, þeah þe Faraon brohte
260
sƿeordƿiȝendra side herȝas,
eorla unrim! Him eallum ƿile
mihtiȝ drihten þurh mine hand
to dæȝe þissum dædlean ȝyfan,
þæt hie lifiȝende lenȝ ne moton
265
æȝnian mid yrmðum Israhela cyn.
Ne ƿillað eoƿ andrædan deade feðan,
fæȝe ferhðlocan, fyrst is æt ende
lænes lifes. Eoƿ is lar ȝodes
abroden of breostum. Ic on beteran ræd,
270
þæt ȝe ȝeƿurðien ƿuldres aldor,
and eoƿ liffrean lissa bidde,
siȝora ȝesynto, þær ȝe siðien.
þis is se ecea Abrahames ȝod,
frumsceafta frea, se ðas fyrd ƿereð,
275
modiȝ and mæȝenrof, mid þære miclan hand."
Hof ða for herȝum hlude stefne
lifiȝendra leod, þa he to leodum spræc:
"Hƿæt, ȝe nu eaȝum to on lociað,
folca leofost, færƿundra sum,
280
hu ic sylfa sloh and þeos sƿiðre hand
ȝrene tacne ȝarsecȝes deop.
Yð up færeð, ofstum ƿyrceð
ƿæter ƿealfæsten. Ƿeȝas syndon dryȝe,
hasƿe herestræta, holm ȝerymed,
285
ealde staðolas, þa ic ær ne ȝefræȝn
ofer middanȝeard men ȝeferan,
faȝe feldas, þa forð heonon
in ece tid yðe þeahton,
sælde sæȝrundas. Suðƿind fornam
290
bæðƿeȝes blæst, brim is areafod,
sand sæcir spaƿ. Ic ƿat soð ȝere
þæt eoƿ mihtiȝ ȝod miltse ȝecyðde,
eorlas ærȝlade. Ofest is selost
þæt ȝe of feonda fæðme ƿeorðen,
295
nu se aȝend up arærde
reade streamas in randȝebeorh.
Syndon þa foreƿeallas fæȝre ȝestepte,
ƿrætlicu ƿæȝfaru, oð ƿolcna hrof."
æfter þam ƿordum ƿerod eall aras,
300
modiȝra mæȝen. Mere stille bad.
Hofon herecyste hƿite linde,
seȝnas on sande. Sæƿeall astah,
uplanȝ ȝestod ƿið Israhelum
andæȝne fyrst. Ƿæs seo eorla ȝedriht
305
anes modes,
fæstum fæðmum freoðoƿære heold.
Nalles hiȝe ȝehyrdon haliȝes lare,
siððan leofes leoþ læste near
sƿeȝ sƿiðrode and sances bland.
310
þa þæt feorðe cyn fyrmest eode,
ƿod on ƿæȝstream, ƿiȝan on heape,
ofer ȝrenne ȝrund, Iudisc feða
on orette on uncuð ȝelad
for his mæȝƿinum. Sƿa him mihtiȝ ȝod
315
þæs dæȝƿeorces deop lean forȝeald,
siððan him ȝesælde siȝorƿorca hreð,
þæt he ealdordom aȝan sceolde
ofer cynericu, cneoƿmaȝa blæd.
Hæfdon him to seȝne, þa hie on sund stiȝon,
320
ofer bordhreoðan beacen aræred
in þam ȝarheape, ȝyldenne leon,
drihtfolca mæst, deora cenost.
Be þam hereƿisan hynðo ne ƿoldon
be him lifiȝendum lanȝe þolian,
325
þonne hie to ȝuðe ȝarƿudu rærdon
ðeoda æniȝre. þracu ƿæs on ore,
heard handpleȝa, hæȝsteald modiȝe
ƿæpna ƿælslihtes, ƿiȝend unforhte,
bilsƿaðu blodiȝe, beadumæȝnes ræs,
330
ȝrimhelma ȝeȝrind, þær Iudas for.
æfter þære fyrde flota modȝade,
Rubenes sunu. Randas bæron
sæƿicinȝas ofer sealtne mersc,
manna menio; micel anȝetrum
335
eode unforht. He his ealdordom
synnum asƿefede, þæt he siðor for
on leofes last. Him on leodsceare
frumbearnes riht freobroðor oðþah,
ead and æðelo; he ƿæs ȝearu sƿa þeah.
340
þær forð æfter him folca þryðum
sunu Simeones sƿeotum comon;
þridde þeodmæȝen (þufas ƿundon
ofer ȝarfare) ȝuðcyste onþranȝ
deaƿiȝ sceaftum. Dæȝƿoma becƿom
345
ofer ȝarsecȝe, ȝodes beacna sum,
morȝen mæretorht; mæȝen forð ȝeƿat.
þa þær folcmæȝen for æfter oðrum,
isernherȝum. An ƿisode
mæȝenþrymmum mæst, þy he mære ƿearð,
350
on forðƿeȝas folc æfter ƿolcnum,
cynn æfter cynne. Cuðe æȝhƿilc
mæȝburȝa riht, sƿa him Moises bead,
eorla æðelo. Him ƿæs an fæder,
leof leodfruma, landriht ȝeþah,
355
frod on ferhðe, freomaȝum leof.
Cende cneoƿsibbe cenra manna
heahfædera sum, haliȝe þeode,
Israela cyn, onriht ȝodes,
sƿa þæt orþancum ealde reccað
360
þa þe mæȝburȝe mæst ȝefrunon,
frumcyn feora, fæderæðelo ȝehƿæs.
Niƿe flodas Noe oferlað,
þrymfæst þeoden, mid his þrim sunum,
þone deopestan drencefloda
365
þara ðe ȝeƿurde on ƿoruldrice.
Hæfde him on hreðre haliȝe treoƿa;
forþon he ȝelædde ofer laȝustreamas
maðmhorda mæst, mine ȝefræȝe.
On feorhȝebeorh foldan hæfde
370
eallum eorðcynne ece lafe,
frumcneoƿ ȝehƿæs, fæder and moder
tuddorteondra, ȝeteled rime
mismicelra þonne men cunnon,
snottor sæleoda. Eac þon sæda ȝehƿilc
375
on bearm scipes beornas feredon,
þara þe under heofonum hæleð bryttiȝað.
Sƿa þæt ƿise men ƿordum secȝað
þæt from Noe niȝoða ƿære
fæder Abrahames on folctale.
380
þæt is se Abraham se him enȝla ȝod
naman niƿan asceop; eac þon neah and feor
haliȝe heapas in ȝehyld bebead,
ƿerþeoda ȝeƿeald; he on ƿræce lifde.
Siððan he ȝelædde leofost feora
385
haliȝes hæsum; heahlond stiȝon
sibȝemaȝas, on Seone beorh.
Ƿære hie þær fundon, ƿuldor ȝesaƿon,
haliȝe heahtreoƿe, sƿa hæleð ȝefrunon.
þær eft se snottra sunu Dauides,
390
ƿuldorfæst cyninȝ, ƿitȝan larum
ȝetimbrede tempel ȝode,
alh haliȝne, eorðcyninȝa
se ƿisesta on ƿoruldrice,
heahst and haliȝost, hæleðum ȝefræȝost,
395
mæst and mærost, þara þe manna bearn,
fira æfter foldan, folmum ȝeƿorhte.
To þam meðelstede maȝan ȝelædde
Abraham Isaac. Adfyr onbran;
fyrst ferhðbana no þy fæȝenra ƿæs.
400
Ƿolde þone lastƿeard liȝe ȝesyllan,
in bælblyse beorna selost,
his sƿæsne sunu to siȝetibre,
anȝan ofer eorðan yrfelafe,
feores frofre, ða he sƿa forð ȝebad,
405
leodum to lafe, lanȝsumne hiht.
He þæt ȝecyðde, þa he þone cniht ȝenam
fæste mid folmum, folccuð ȝeteaȝ
ealde lafe, (ecȝ ȝrymetode),
þæt he him lifdaȝas leofran ne ƿisse
410
þonne he hyrde heofoncyninȝe.
Up aræmde Abraham þa;
se eorl ƿolde slean eaferan sinne
unƿeaxenne, ecȝum reodan
maȝan mid mece, ȝif hine metod lete.
415
Ne ƿolde him beorht fæder bearn ætniman,
haliȝ tiber, ac mid handa befenȝ.
þa him styran cƿom stefn of heofonum,
ƿuldres hleoðor, ƿord æfter spræc:
"Ne sleh þu, Abraham, þin aȝen bearn,
420
sunu mid sƿeorde! Soð is ȝecyðed,
nu þin cunnode cyninȝ alƿihta,
þæt þu ƿið ƿaldend ƿære heolde,
fæste treoƿe, seo þe freoðo sceal
in lifdaȝum lenȝest ƿeorðan,
425
aƿa to aldre unsƿiciendo.
Hu þearf mannes sunu maran treoƿe?
Ne behƿylfan mæȝ heofon and eorðe
his ƿuldres ƿord, ƿiddra and siddra
þonne befæðman mæȝe foldan sceattas,
430
eorðan ymbhƿyrft and uprodor,
ȝarsecȝes ȝin and þeos ȝeomre lyft.
He að sƿereð, enȝla þeoden,
ƿyrda ƿaldend and ƿereda ȝod,
soðfæst siȝora, þurh his sylfes lif,
435
þæt þines cynnes and cneoƿmaȝa,
randƿiȝȝendra, rim ne cunnon,
yldo ofer eorðan, ealle cræfte
to ȝesecȝenne soðum ƿordum,
nymðe hƿylc þæs snottor in sefan ƿeorðe
440
þæt he ana mæȝe ealle ȝeriman
stanas on eorðan, steorran on heofonum,
sæbeorȝa sand, sealte yða;
ac hie ȝesittað be sæm tƿeonum
oð Eȝipte incaðeode
445
land Cananea, leode þine,
freobearn fæder, folca selost."
Folc ƿæs afæred, flodeȝsa becƿom
ȝastas ȝeomre, ȝeofon deaðe hƿeop.
Ƿæron beorhhliðu blode bestemed,
450
holm heolfre spaƿ, hream ƿæs on yðum,
ƿæter ƿæpna ful, ƿælmist astah.
Ƿæron Eȝypte eft oncyrde,
fluȝon forhtiȝende, fær onȝeton,
ƿoldon herebleaðe hamas findan,
455
ȝylp ƿearð ȝnornra. Him onȝen ȝenap
atol yða ȝeƿealc, ne ðær æniȝ becƿom
herȝes to hame, ac behindan beleac
ƿyrd mid ƿæȝe. þær ær ƿeȝas laȝon,
mere modȝode, mæȝen ƿæs adrenced.
460
Streamas stodon, storm up ȝeƿat
heah to heofonum, hereƿopa mæst.
Laðe cyrmdon, (lyft up ȝesƿearc),
fæȝum stæfnum, flod blod ȝeƿod.
Randbyriȝ ƿæron rofene, rodor sƿipode
465
meredeaða mæst, modiȝe sƿulton,
cyninȝas on corðre, cyre sƿiðrode
sæs æt ende. Ƿiȝbord scinon
heah ofer hæleðum, holmƿeall astah,
merestream modiȝ. Mæȝen ƿæs on cƿealme
470
fæste ȝefeterod, forðȝanȝes ƿeȝ
searƿum æsæled, sand basnodon,
ƿitodre fyrde, hƿonne ƿaðema stream,
sincalda sæ, sealtum yðum
æflastum ȝeƿuna ece staðulas,
475
nacud nydboda, neosan come,
fah feðeȝast, se ðe feondum ȝeneop.
Ƿæs seo hæƿene lyft heolfre ȝeblanden,
brim berstende blodeȝesan hƿeop,
sæmanna sið, oðþæt soð metod
480
þurh Moyses hand modȝe rymde,
ƿide ƿæðde, ƿælfæðmum sƿeop.
Flod famȝode, fæȝe crunȝon,
laȝu land ȝefeol, lyft ƿæs onhrered,
ƿicon ƿeallfæsten, ƿæȝas burston,
485
multon meretorras, þa se mihtiȝa sloh
mid haliȝe hand, heofonrices ƿeard,
on ƿerbeamas. Ƿlance ðeode
ne mihton forhabban helpendra pað,
merestreames mod, ac he maneȝum ȝesceod
490
ȝyllende ȝryre. Ȝarsecȝ ƿedde,
up ateah, on sleap. Eȝesan stodon,
ƿeollon ƿælbenna. Ƿitrod ȝefeol
heah of heofonum handƿeorc ȝodes,
famiȝbosma flodƿearde sloh,
495
unhleoƿan ƿæȝ, alde mece,
þæt ðy deaðdrepe drihte sƿæfon,
synfullra sƿeot. Saƿlum lunnon
fæste befarene, flodblac here,
siððan hie on buȝon brun yppinȝe,
500
modeƿæȝa mæst. Mæȝen eall ȝedreas
ða ȝedrencte ƿæron duȝoð Eȝypta,
Faraon mid his folcum. He onfond hraðe,
siððan ȝrund ȝestah ȝodes andsaca,
þæt ƿæs mihtiȝra mereflodes ƿeard;
505
ƿolde heorufæðmum hilde ȝesceadan,
yrre and eȝesfull. Eȝyptum ƿearð
þæs dæȝƿeorces deop lean ȝesceod,
forðam þæs heriȝes ham eft ne com
ealles unȝrundes æniȝ to lafe,
510
þætte sið heora secȝan moste,
bodiȝean æfter burȝum bealospella mæst,
hordƿearda hryre, hæleða cƿenum,
ac þa mæȝenþreatas meredeað ȝesƿealh,
spelbodan eac. Se ðe sped ahte,
515
aȝeat ȝylp ƿera. Hie ƿið ȝod ƿunnon!
þanon Israhelum ece rædas
on merehƿearfe Moyses sæȝde,
heahþunȝen ƿer, haliȝe spræce,
deop ærende. Dæȝƿord nemnað
520
sƿa ȝyt ƿerðeode, on ȝeƿritum findað
doma ȝehƿilcne, þara ðe him drihten bebead
on þam siðfate soðum ƿordum,
ȝif onlucan ƿile lifes ƿealhstod,
beorht in breostum, banhuses ƿeard,
525
ȝinfæsten ȝod ȝastes cæȝon.
Run bið ȝerecenod, ræd forð ȝæð,
hafað ƿislicu ƿord on fæðme,
ƿile meaȝollice modum tæcan
þæt ƿe ȝesne ne syn ȝodes þeodscipes,
530
metodes miltsa. He us ma onlyhð,
nu us boceras beteran secȝað
lenȝran lifƿynna. þis is læne dream,
ƿommum aƿyrȝed, ƿreccum alyfed,
earmra anbid. Eðellease
535
þysne ȝystsele ȝihðum healdað,
murnað on mode, manhus ƿiton
fæst under foldan, þær bið fyr and ƿyrm,
open ece scræf. Yfela ȝehƿylces
sƿa nu reȝnþeofas rice dælað,
540
yldo oððe ærdeað. Eftƿyrd cymð,
mæȝenþrymma mæst ofer middanȝeard,
dæȝ dædum fah. Drihten sylfa
on þam meðelstede maneȝum demeð,
þonne he soðfæstra saƿla lædeð,
545
eadiȝe ȝastas, on uprodor,
þær is leoht and lif, eac þon lissa blæd;
duȝoð on dreame drihten heriȝað,
ƿeroda ƿuldorcyninȝ, to ƿidan feore.
Sƿa reordode ræda ȝemyndiȝ
550
manna mildost, mihtum sƿiðed,
hludan stefne; here stille bad
ƿitodes ƿillan, ƿundor onȝeton,
modiȝes muðhæl; he to mæneȝum spræc:
"Micel is þeos meniȝeo, mæȝenƿisa trum,
555
fullesta mæst, se ðas fare lædeð;
hafað us on Cananea cyn ȝelyfed
burh and beaȝas, brade rice;
ƿile nu ȝelæstan þæt he lanȝe ȝehet
mid aðsƿare, enȝla drihten,
560
in fyrndaȝum fæderyncynne,
ȝif ȝe ȝehealdað haliȝe lare,
þæt ȝe feonda ȝehƿone forð oferȝanȝað,
ȝesittað siȝerice be sæm tƿeonum,
beorselas beorna. Bið eoƿer blæd micel!"
565
æfter þam ƿordum ƿerod ƿæs on salum,
sunȝon siȝebyman, (seȝnas stodon),
on fæȝerne sƿeȝ; folc ƿæs on lande,
hæfde ƿuldres beam ƿerud ȝelæded,
haliȝe heapas, on hild ȝodes.
570
Life ȝefeȝon þa hie oðlæded hæfdon
feorh of feonda dome, þeah ðe hie hit frecne ȝeneðdon,
ƿeras under ƿætera hrofas. Ȝesaƿon hie þær ƿeallas standan,
ealle him brimu blodiȝe þuhton, þurh þa heora beadosearo ƿæȝon.
Hreðdon hildespelle, siððan hie þam herȝe ƿiðforon;
575
hofon hereþreatas hlude stefne,
for þam dædƿeorce drihten heredon,
ƿeras ƿuldres sanȝ; ƿif on oðrum,
folcsƿeota mæst, fyrdleoð ȝolan
aclum stefnum, eallƿundra fela.
580
þa ƿæs eðfynde Afrisc meoƿle
on ȝeofones staðe ȝolde ȝeƿeorðod.
Handa hofon halsƿurðunȝe,
bliðe ƿæron, bote ȝesaƿon,
heddon herereafes, hæft ƿæs onsæled.
585
Onȝunnon sælafe seȝnum dælan
on yðlafe, ealde madmas,
reaf and randas. Heo on riht sceodon
ȝold and ȝodƿeb, Iosepes ȝestreon,
ƿera ƿuldorȝesteald. Ƿeriȝend laȝon
590
on deaðstede, drihtfolca mæst.