Anglo Saxon Chronicle (H)

1113
for se abbod Petrus on Glowecestre on þone dæg .xvi Kalendas Augustus. 7 se king sette Willelm ðarto wæs munuc on ðam ylcon mynstre on ðam dæ .iii. Nonas Octobris eac he beb....
1114
ON ÐYSUM GEARE WÆS se king Henrig on Windelesoran to ðam midanwintran, 7 bær ðar his kinehelm; 7 geaf ðar þæt biscoprice on Wigracestre Teobalde his clerice. Eac he geaf þæt abborice on Ramsige Rainalde wæs munuc on Caðum. Eac he geaf þæt abbodrice on Eoforwic Ricarde wæs munuc on ðam ylcon mynstre. Eac he geaf þæt abbodrice æ Ðornige Rodberte wæs munuc æt Sancte Ebroulfi. Eac he geaf þone eorldom on Norðhamtunscire Dauide wæs ðære cwene broðor. Þar æfter gefor Thomas se arcebiscop on Eofowic on ðone dæg .xiii Kalendas Martii þar æfter he geaf þæt abbodrice æt Cernel. Willelme wæs munuc æt Caðum. Þa to ðam Eastran he wæs æt Þorp wið Norðhamtune. Þar æfter he geaf þæt ercebiscoprice on Cantwarabyrig Rawulfe wæs biscop on Rofeceastre; 7 feng þarto on ðone dæg .vi Kalendas Martii. Þa ðar æfter gefor se abbod Nigel on Byrtune on ðone dæg .v. Nonas Maii. Þar æfter forbarn Cicestre 7 þæt mynster ðar forð mid on ðone dæg .iii. Nonas Maii. Þa to ðam Pentecosten wæs se king æt Sancte Albanes stowe. Her æfter he ferde mid his fyrde in to Wealan to midesumeran 7 macode castelas ðerinne; 7 ða Wyliscean kingas coman to him 7 be coman his menn 7 him held aðas sworan. Þar æfter he com to Wincestre 7 geaf ðar þæt ercebiscoprice on Eoforwic Turstane his clerice; 7 þæt abbodrice æt Sancte Eadmunde he geaf Albolde wæs munuc on Becc. on ðone dæg xvii Kalendas Septembris. Þar æfter he geaf þæt abbodrice on Myclan yge Ealdulfe wæs munuc on ðam ylcon mynstre on ðone dæg Exaltation Sancte. Eac he geaf þæt abbodrice on Byrtune Goisfri ðe wæs munuc on Ealdan mynstre æt ðam ylcon sæle se arcebiscop Radulf geaf þæt biscoprice on Rofecestre [...]