HAE LOST MY JEANIE, O.
Tune, 'The Lee Rigg.'
O I hae seen when fields were green,
And birds sae blythe and cheerie, O,
How swift the day wad pass away.
When I was wi' my dearie, O:
But now I neither laugh nor sing,
My looks are alter'd cleanlie, O;
I'll never like a lass again,
Since I hae lost my Jeanie, O.
Now I maun grane an' greet my lane,
An' never ane to heed me, O;
My claes, that ay were neat an' clean,
Can scarce be said to cleed me, O;
My heart is sair, my elbows bare,
My pouch without a guinea, O;
I'll never taste o' pleasure mair,
Since I hae lost my Jeanie, O.
O Fortune! thou hast us'd me ill;
Far waur than my deservin', O;
Thrice o'er the crown thou'st knock'd me down,
An' left me hafflins starvin', O:
Thy roughest blast has blawn the last,
My lass has us'd me meanlie, O;
Thy sharpest dart has pierc'd my heart,
An' ta'en frae me my Jeanie, O.
I'll nae mair strive, while I'm alive,
For aught but missin' slavery, O.
This world's a stage, a pilgrimage,
A mass o' nought but knav'ry, O:
If fickle fame but save my name,
An' frae oblivion screen me, O;
Then farewell fortune, farewell love,
An' farewell bonnie Jeanie, O.
FINIS.
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse