Bessy Bell & Mary Gray/Blythe around the nappy

---

SCOTIA’S SONS.

Tune—Andro and his cutty gun.

⁠Blythe, blythe, aroun’ the nappy,
⁠Let us join in social glee;
⁠While we re here we'll hae a drappy,
⁠Scotia’s sons hae ay been free.

⟨Our⟩ auld forbears, when owre their gill,
⁠And cantie bickers roun' did ca',
Forsooth' they cried, 'anither gill,
⁠For sweer't we ⟨are⟩ to gang awa.’
⁠Blythe, blythe, &c.

⟨Some⟩ heartie cock would then hae sang
⁠Some auld Scotch sonnet aff wi' ⟨glee⟩,
Syne pledg‘d his cog, the chorus rang,
⁠Auld Scotia and her sons are free.
⁠Blythe, blythe, &c.

Thus cracks, and jokes, and sangs gaed roun',
⁠Till morn the screens of light did draw,
Yet driech to rise, the carls roun',
⁠Cry‘d Deuch-an-dherus, then awa ‘
⁠Blythe, blythe, &c.

The landlord then the nappy brings,
⁠Toasts how happy a‘ may be,
Syne tooms the cog, the chorus rings,
⁠Auld Scotia's sons shall ay be free.
⁠Blythe, blythe, &c.

Then like our dads o’ auld langsyne,
⁠Let social glee unite us a',
Ay blythe to meet, our mou's to weet,
⁠But ay as sweer't to gang awa
⁠Blythe, blythe, &c.