For other versions of this work, see Balade to Rosemounde.
Balade to Rosemounde  (1477) 
by Geoffrey Chaucer

Ma dame ye ben of Al Beaute ſhryne
As fer As cercled is the mapamonde
For As the cristall glorious ye ſhyne
And lyke Ruby ben your chekys rounde
Therwyth ye ben ſo mery and ſo iocunde
That At A Reuell whan that I ſe you dance
It is an oynement vnto my wounde
Thoght ye to me ne do no daliance.

For thogh I wepe of teres ful A tyne
Yet may that wo myn herte nat confounde
Your ſemy voys that ye ſo ſmall out twyne
Makyth my thoght in ioy And blys habounde
So curtayſly I go wyth love bounde
That to my ſelf I ſey in my penaunce
Suffyſeth me to loue you Rosemounde
Thogh ye to me ne do no daliaunce.

Nas never pyk walwed in galauntyne
As I in love Am walwed And I wounde
For whych ful ofte I of my ſelf devyne
That I Am trew Tristam the ſecunde
My love may not refreyde nor affounde
I brenne Ay in an Amorouſe pleſaunce
Do what you lyſt I wyl your thral be founde
Thogh ye to me ne do no daliance.


This work was published before January 1, 1928, and is in the public domain worldwide because the author died at least 100 years ago.

Public domainPublic domainfalsefalse