Evangelium Secundum Mattheum: the Gospel of Saint Matthew in West-Saxon/Chapter 1
INCIPIT EUANGELIUM SECUNDUM
Mattheum
CAPUT I
1. Æfter Matheus gerecednysse, hēr is on cnēorisse bōc Hǣlendes Crīstes, Dauides suna, Abrahames suna.[1]
2. Sōðlīce Abraham gestrȳnde Isaac; Isaac gestrȳnde Iacob; Iacob gestrȳnde Iudam and his gebrōðra;[2]
3. Iudas gestrȳnde Phares and Zaram of þām wīfe þe wæs genemned Thamar; Phares gestrȳnde Esrom; Esrom gestrȳnde Aram;[3]
4. Aram gestrȳnde Aminadab; Aminadab gestrȳnde Naason; Naason gestrȳnde Salmon;
5. Salmon gestrȳnde Booz of þām wīfe Raab; Booz gestrȳnde Obeth of þām wīfe Ruth; Obeth gestrȳnde Iesse;[4]
6. Iesse gestrȳnde þone cyning Dauid; Dauid cyning gestrȳnde Salomon of þām wīfe þe wæs Urias wīf.[5]
7. Salomon gestrȳnde Roboam; Roboas gestrȳnde Abiam; Abia gestrȳnde Asa;[6]
8. Asa gestrȳnde Iosaphath; Iosaphath gestrȳnde Ioram; Ioras gestrȳnde Oziam;[7]
9. Ozias gestrȳnde Ioatham; Ioatham gestrȳnde Achaz; Achaz gestrȳnde Ezechiam;[8]
10. Ezechias gestrȳnde Mannasen; Mannases gestrȳnde Amon; Amon gestrȳnde Iosiam;[9]
11. Iosias gestrȳnde Iechoniam and his gebrõþru, on Babilonis gelēorednysse.[10]
12. And æfter Babilonys gelēorednysse, Iechonias gestrȳnde Salathiel; Salathiel gestrȳnde Zorobabel;[11]
13. Zorobabel gestrȳnde Abiud; Abiud gestrȳnde Eliachim ; Eliachim gestrȳnde Azor;[12]
14. Azor gestrȳnde Sadoc; Sadoc gestrȳnde Achim; Achim gestrȳnde Eliud;[12]
15. Eliud gestrȳnde Eleazar; Eleazar gestrȳnde Mathan; Mathan gestrȳnde Iacob;[12]
16. Iacob gestrȳnde Ioseph Marian wer, of þǣre wæs ācenned'sē Hǣlend þe is genemned Crīst.[12]
17. Eornostlīce ealle cnēoressa fram Abrahame oð Dauid synd fēowertȳne cnēoressa; and fram Dauide oð Babilonis gelēorednysse fēowertȳne cnēoressa; and fram Babilonis gelēorednesse oð Crīst fēowertȳne cnēoressa.[13]
Đys godspel gebyrað on mydewyntres mæsseǣfen.
18. Sōðlīce þus wæs Crīstes cnēores: Đā þæs Hǣlendes mōdor Maria wæs Iosepe beweddod, ǣr hī tōsomne becōmun, hēo wæs gemēt on innoðe hæbbende of þām Hālegan Gāste.[14]
19. Sōðlīce Iosep hyre wer, ðā hē wæs rihtwīs and nolde hī gewīdmǣrsian, hē wolde hī dīhlīce forlǣtan.[15]
20. Him þā sōðlīce ðās þing ðencendum Drihtnes engel on swefnum ætȳwde, and him tō cwæð, Iosep, Dauides sunu, nelle þū ondrǣdan Marian þīne gemæccean tō onfōnne; þæt on hire ācenned ys, hyt ys of þām Hālgan Gāste.[16]
21. Witodlīce hēo cenð sunu, and þū nemst hys naman Hǣlend; hē sōðlīce hys folc hāl gedēð fram hyra synnum.[17]
22. Sōþlīce eal þys wæs geworden þæt gefylled wǣre þæt fram Drihtne gecweden wæs þurh þone wītegan,[18]
23. Sōðlīce sēo fǣmne hæfð on innoðe, and hēo cenð sunu, and hī nemnað his naman Emanuhel, þæt ys gereht on ūre geþēode, God mid ūs.[19]
24. Đā ārās Iosep of swefene, and dyde swā Drihtnes engel him bebēad, and hē onfēng his gemæccean;[20]
25. and hē ne grētte hī. Hēo cende hyre frumcennedan sunu, and nemde hys naman Hǣlend.
- ↑ B, Efter; A, gerecednesse; A, om. on.
- ↑ A, gestrinde (three times; corrected into gestrynde).
- ↑ A, gestrinde (first time)
- ↑ A, gestrinde (three times)
- ↑ A, gestrinde (first time); A, cining (second time).
- ↑ A, gestrinde (first and third times; second time corrected into gestrynde).
- ↑ A, gestrinde (three times); B, Iosaphat (second time).
- ↑ A, gestrinde (second and third times; first time corrected into gestrynde); Ioatham (second time changed into Ioathas).
- ↑ A, gestrinde (three times).
- ↑ A, gestrinde; A, -nesse.
- ↑ A, babilones; A, -nesse; A, gestrinde (twice).
- ↑ 12.0 12.1 12.2 12.3 A, gestrinde (throughout).
- ↑ A, eornestlice; A, cneorisna (four times); A, geleornesse (twice); A, feowertine (second time; corrected into feowertyne); A, babilones (second time); A, feowertine (third time).
- ↑ A, cneorisn; A, moder; A, beweddad; A, becomon; A, heo wæs gemet hæbbende on innoðe (changed order); A, halgan.
- ↑ A, ioseph hire; A, digelice.
- ↑ A, Ioseph; A, gemæccan, B, gemeccean; A, onfone.
- ↑ A, cenneð; A, nemnest his.
- ↑ A, eall.
- ↑ A, cenneð; A, emanuel.
- ↑ A, ioseph; A, swefne; A, genæccan.