This page has been validated.

BONNIE BABY LIVINGSTONE.



O bonnie Baby Livingstone
Gaed out to view the hay;
And by it cam’ him Glenlyon,
Staw bonnie Baby away.

And first he’s ta’en her silken coat,
And neist her satten gown;
Syne row’d her in his tartan plaid,
And happ’d her round and roun’.

He’s mounted her upon a steed,
And roundly rade away;
And ne’er loot her look back again
The lee-lang simmer day.

He’s carried her o’er yon hich hich hill,
Intil a Highland glen,
And there he met his brother John
Wi’ twenty armed men.

And there were cows, and there were ewes,
And there were kids sae fair;
But sad and wae was bonnie Baby;
Her heart was fu’ o’ care.