Page:Coalman's courtship to the creel-wife's daughter (8).pdf/8

This page has been validated.

8

gin they gie you cheese and bread, or ony meat, be sure you ca't guid, whether it be sae or no; and for my blessing, be mensfu wi your mouth, and dinna eat unca muckle, for I've seen you sup as mony milk brose as would have saired twa men to carry on a barrow.

Sawney. Aha, but mither your'e lying now, for I never did it but ance, but an they set meat afore me an I be hungry, deil claw the clungest an I binna upsides with it for the same. Adeed mither, fouk maun hae meat an they should neer get wives, and there some of them no worth cursing, an a body werna setting an oath whether or no; a hear ye that now, when ye put me till't, and gar me speak, ay by my sooth, I would rather hae a bit good poney and a pund of cheese, or I were bound to bab after ony hizzies buttocks I see yet.

Mither. Wa Sawny man, thou's a fool, an that's a fault; gin every ane were as easy about women as thou is, the warld wad be a wilderness in a wee time, there wad be nae body to inhabit the earth but brute beasts; cats and dogs wad be worrying ither, and every thing wad gae to confusion. Gae to the courting, ye dog that ye are, and either do something or naething at a'.

END OF PART I.