Page:The fables of Aesop, as first printed by William Caxton in 1484, with those of Avian, Alfonso and Poggio. Vol 2.djvu/163

 

And that yere he gadred moche good / by cauſe of the good diſpoſycion of the ſeaſon and tyme / ¶ And on a daye of the ſame yere / the ſerpent ſawe the ſayd labourer comynge fro the herueſt / to whome he came ageynſte / And ſayd / Now ſaye me my good Frend / Haſt thow not fond now grete plente of goodes / as I had told to the byfore   And the labourer anſuerd and ſayd ye certaynly / wherof I thanke the / ¶ And thenne the Serpent demaunded of hym Remuneracion or reward / ¶ And the labourer thenne demaunded what he wold haue of hym / And the Serpent ſayd I ne demaunde of the nothynge / but only that to morowe on the mornyng thow wylt ſende me a dyſſh ful of mylk by ſom of thy children / ¶ And thenne the ſerpent ſhewed to the labourer the hole of his dwellyng / & ſayd to hym / telle thy ſone that he brynge the mylke hyther / but take good heede to that that other whyle I told to the / that thow byleueſt not hym / to whome thou haſt done euylle / ¶ And anone after whanne theſe thynges were ſayd / the labourer wente homeward / and in the morninge next folowynge / he betoke to his ſone a dyſſhe full of mylke / whiche he brought to the ſerpent / and ſette the dyſſhe before the hool / And anone the ſerpent came oute and ſlewe the