Page:The fables of Aesop, as first printed by William Caxton in 1484, with those of Avian, Alfonso and Poggio. Vol 2.djvu/176

This page has been proofread, but needs to be validated.
160
LIBER

¶ He had not long walked / whanne he fond a sowe / and her ſmal pygges with her / And Incontynent as he ſawe her / he ſayd / bleſſed be god of that I ſhalle this daye ete and fylle my bely with precious metes / and ſhalle haue good fortune / And in that ſayenge approched to the ſowe / & ſayd to her / My ſuſter I muſt ete ſomme of thy yonge pygges   And the ſowe wente and ſayd to hym / my lord I am content of alle that / whiche pleaſeth to yow / But or ye ete them / I praye yow that they maye be baptyſed and made clene in pure and fayre water / And the wulf ſayd to the ſowe / Shewe me thenne the water / And I ſhalle waſſhe and baptyſe them wel / And thenne the ſowe wente and ledde hym at a ſtange or pond where as was a fayr mylle  ¶ And as the wulf was vpon the lytyl brydge of the ſayd mylle / and that he wold haue take one pygge / the ſowe threwe the wulf in to the water with her hede / and for the ſwyftneſſe of the water / he muſt nedes paſſe vnder the whele of the mylle / And god wote yf the wynges of the mylle bete hym wel or not / And as ſoone as he myght / he ranne away / And as he ranne ſeyd to hym ſelf / I care not for ſoo lytyl a ſhame / ne therfore I ſhall not be bette / but that I ſhalle yet this daye ete my bely full of metes delycious / as myn ers dyd ſynge it erly