Page:The fables of Aesop, as first printed by William Caxton in 1484, with those of Avian, Alfonso and Poggio. Vol 2.djvu/183

 

thenne ſemblant to renne after me / and lete thy ſelf falle faynynge that thow canſt not ouertake me / for lack and fawte of mete / whiche maketh the ſo feble / And thus whanne the ſheepherd ſhalle ſee that thow mayſt not haue the lambe fro me by cauſe of the grete febleneſſe and debylyte of thy lene body / he ſhell telle to thy lord that thow myghteſt not socoure the lambe / by cauſe that thow arte ſo ſore ahongryd / and by this means thow ſhalt haue mete thy bely ful / ¶ The dogge thenne acorded this with the wulf / and eche of them made and dyde as aboue is ſayd / ¶ And whane the ſheep herd ſawe the dogge falle / ſuposed wel / that honger was a cauſe of it   Forthe whiche cauſe whanne one of the ſheep herdes came home he told hit to his mayſter / And whan the mayſter vnderſtood hit / he ſayd as a man wroth for ſhame / I wylle that fro hens forthon he haue breed ynough / ¶ And thenne euery daye the ſayd dogge hadde ſoppes of brede / and of drye breed he hadde ynough / ¶ Thenne the dogge toke ſtrengthe/ and vygour ageyne / ¶ It happed within a lytyl whyle after / that the wulf came ageyne to the dogge / and ſayd to hym / I perceyue wel / that I gaf to the good counceylle / And the dogge ſayd to the wulf / My broder thow fayſt soothe / wherfore I thanke the moche / For of hit I hadde grete nede /