ne that letteth more the man / than tharowe whiche is ſhotte fro the euyll tongue / For whanne ſom perſone profereth or layth ſom wordes in a felauſhip / of ſommen a of[errata 1] honeſt & good lyf / alle the felauſhip ſuppoſeth that that whiche this euylle tongue hath ſayd be trewe / be hit trewe or not / how be it that it be but leſynge / but notwithſtondynge the good man ſhalle euer be wounded of that ſame arowe / whiche wound ſhalle be Incurable / And yf hit were a ſtroke of a ſpere / hit myght be by the Cyrurgyen heled / but the ſtroke of an euylle tongue may not be heled / by cauſe that Incontynent as the word is profered or ſayd / he that hath ſayd hit / is no more mayſter of hit / And for this cauſe the ſtroke of a tongue is Incurable and withoute guaryſon
