This page needs to be proofread.
LIX
Bononiensis Rufa
uxor Meneni, saepe quam in sepulcretis
vidistis ipso rapcre de rogo cenam,
cum devolutum ex igne prosequens panem
ab semiraso tunderetur ustore.
LX
Num te leaena montibus Libystinis
aut Scylla latrans infima inguinum parte
tam mente dura procreavit ac taetra,
ut supplicis vocem in novissimo casu
contemptam haberes, a nimis fero corde?
LXI
Collis o Heliconii
cultor, Uraniae genus,
qui rapis teneram ad virum
virginem, o Hymenaee Hymen,
o Hymen Hymenaee,5
cinge tempora floribus
suave olentis amaraci,
flammeum cape, laetus hue
hue veni niveo gerens
luteum pede soccum,10
excitusque hilari die,
nuptialia concinens
voce carmina tinnula,
pelle humum pedibus, manu
pineam quate taedam.15
