Norland Jockey.
[From Herd's Collection.]
A Southland Jenny, that was right bonnie,
Had for a suitor a Norland Johnnie;
But he was sicken a bashful wooer,
That he could scarcely speak unto her;
Till blinks o' her beauty, and hopes o' her siller,
Forced him at last to tell his mind till her,
My dear, quoth he, we'll nae langer tarry,
Gin ye can loo me, let's o'er the muir and marry.
She.
Come, come awa' then, my Norland laddie,
Though we gang neatly, some are mair gawdy;
And albeit I have neither gowd nor money,
Come, and I'll ware my beauty on thee.
He.
Ye lasses o' the south, ye're a' for dressing;
Lasses o' the north mind milking and threshing;
My minny wad be angry, and sae wad my daddy,
Should I marry ane as dink as a lady;
For I maun ha'e a wife that will rise i" the morning,
Crudle a' the milk, and keep the house a' scolding,
Toolie wi' her nei'bours, and learn at my minny,
A Norland Jocky maun ha'e a Norland Jenny.
She.
My father's only daughter, and twenty thousand pound,
Shall never be bestow'd on sic a silly clown:
For a' that I said was to try what was in ye;
Ga'e hame, ye Norland Jock, and court your Norland Jenny.