The Book of Scottish Song/The days o' auld Langsyne

The days o’ auld Langsyne.

[M'Phail.—Tune, "The Burnside."]

O happy, happy were the days o' auld langsyne,
The hamely sweets, the social joys o' auld langsyne,
When ilka ane wi' friendly glow and cordial heart wad join,
To pledge wi' frien'ship leal and true the days o' langsyne.
⁠When ilka ane, &c.

How fled the joys that we ha'e seen, o' auld langsyne,
When happy aft we baith ha'e been, in days o' langsyne:
Still ilka former tender scene, wi' dear delight we min',
But a' alas! can ne'er reca' the days o' langsyne.
⁠Still ilka former, &c.

How sweet the fond endearing charms o' auld langsyne,
Wi' Jeanie in my youthfu' arms, in days o' langsyne;
In rapture press'd her throbbing breast wi' glowing love to mine,
Thae happy hours flew o'er wi' bliss in days o' langsyne.
⁠In rapture press'd, &c.

Amang our native woods and braes how pleasant the time,
To pu' for her I loo'd sae dear the primrose in its prime:
Then fairer bloom'd ilk bonnie flower, mair sweet the birds did sing,
When wi' the lass I dearly lo'ed, in days o' langsyne.
⁠Then fairer bloom'd, &c.

Nae mair amang our bonnie glens we'll garlands entwine,
Nor pu' the wild-flower by the burn, to busk my lassie fine;
Nae mair upon yon sunny knowe we'll mark the sun decline,
Nor tell the tender tales that pleased in days o' langsyne.
⁠Nae mair upon, &c.

But still through life we'll happy be, at fate ne'er repine:
Though warldly cares, at times, should thraw, we'll ne'er our pleasure tyne;
While seated here, in frien'ly glow, wi' hearts an' han's we join,
And bring again, wi' cantie glee, the days o' langsyne.
⁠While seated here, &c.

---