Up in the air.
[This convivial song is by Allan Ramsay. It will be remembered that the burthen of the first verse,
"Up in the air
On my bonnie grey mare,
And I see her yet, and I see her yet"—
is put into the mouth of poor Madge Wildfire, in Sir Walter Scott's inimitable tale of "The Heart of Mid Lothian."]
Now the sun's gane out o' sight,
Beet the ingle, and snuff the light:
In glens the fairies skip and dance,
And witches wallop o'er to France.
Up in the air
On my bonny grey mare,
And I see her yet, and I see her yet.
Up in, &c.
The wind's drifting hail and sna',
O'er frozen hags like a foot-ba';
Nae starns neek through the azure slit,
'Tis cauld and mirk as ony pit.
The man i' the moon
Is carousing aboon,
D'ye see, d'ye see, d'ye see him yet.
The man, &c.
Tak' your glass to clear your een,
'Tis the elixir heals the spleen,
Baith wit and mirth it will inspire,
And gently puffs the lover's fire.
Up in the air,
It drives away care,
Ha'e wi' ye, ha'e wi' ye, and ha'e wi' ye, lads, yet.
Up in, &c.
Steek the doors, keep out the frost,
Come, Willy, gi'es about ye'r toast,
Till't lads, and lilt it out,
And let us ha'e a blythsome bowt.
Up wi't, there, there,
Dinna cheat, but drink fair,
Huzza, huzza, and huzza lads, yet.
Up wi't, &c.