¶ The xj fable is of the ante and of the columbe
One ought to be ſlowful of the good whiche he receyueth of other / As reherceth this fable of an Ante / whiche came to a fontayne for to drynke / and as ſhe wold haue dronke ſhe felle within the fontayn / vpon the whiche was a columbe or douue / whiche ſeyng that the Ante ſhold haue ben drowned withoute helpe / took a braunche of a tree / & caſt it to her for to ſaue her ſelf / ¶ And the Ante wente anone upon the braunche and ſaued her / ¶ And anone after came a Fawkoner / whiche wold haue take the douue / And thenne the Ante whiche ſawe that the Fawkoner dreſſed his nettes came to his foote / and ſoo faſt pryked hit / that ſhe cauſed hym to ſmyte the erthe with his foote / and therwithe made ſoo gret noyſe / that the douue herd hit / wherfore ſhe flewhe aweye or the gynne and nettes were al ſette / ¶ And therfore none ought to forgete the benyfyce whiche he hath receyued of ſome other / for ſlowfulneſſe is a grete ſynne