¶ The ix fable maketh mencyon of the wulf and of the kydde
Ood Children ought to obſerue and
kepe euer the comaundements of
theyr good parents and frendes /
wherof Eſope reciteth to vs ſuche
a fable / Of a gote whiche had
made her yonge kyde / and honger toke her ſoo
that ſhe wold haue gone to the feldes for to ete
ſome graſſe / wherfore ſhe ſayd to her kyd / My
child / beware wel / that yf the wulf come hyder
to ete the / that thou opene not the dore to hym
¶ And whanne the gote was gone to the feldes /
came the wulf to the dore / And ſaynynge the
gotes voyce ſayd to the kydde / My child opene
to me the dore / And thenne the kydde anſuerd to
hym / goo hens euylle and fals beſte / For well
I ſee the thurgh that hole / But for to haue me
thow fayneſt the voyce of my moder / ¶ And
therfore I ſhalle kepe me well fro openynge of
ony dore of this hows / And thus the good children
ought euer to kepe wel / and put in theyr
hert & memory the doctryne and the techyng of
theyr parentes / For many one is vndone and loſt
for faulte of obedyence