Patie's wedding, or, All parties pleased (2)/Patie's Wedding

PATIE'S WEDDING.

AS Patie came up frae the glen,
drivin' his wedders before him,
He met bonny Meg ganging hame,
her beauty was like for to ſmore him.

O dinna ye ken, bonny Meg,
that you and I's ga'en to be marry'd
I rather had broken my leg
before ſic a bargain miſcarry'd.

Now Patie—O wha's tell’d you that?
I think that of news they've been ſcanty
That I ſhall be marry'd ſae ſoon,
or yet ſhould ha'e been ſae ſlantly.

I winna be marry'd the year,
ſuppoſe I were courted by twenty;
Sae Patie, ye need nae mair ſpeer,
for weel I wat I dinna want ye.

Now Maggy, what maks you ſae ſweer
is't 'cauſe that I hinna a maillen?
The lad that has plenty o’ gear
need ne'er a ha'f or a hail ane.

My dad has a good grey mare,
and your's has twa cows and a filly,
And that will be plenty o' gear,
fae Maggy be no ſae ill willy.

Indeed Patie, I dinna ken,
but firſt ye maun ſpeer at my daddy,
You're as well born as Ben,
and I canna ſay but I'm ready.

There's plenty o' yarn in clues,
to mak me a coat and a jimpy,
And plaiden enough to be trews,
gif ye get it, I ſhinna ſcrimp ye.

Now fair fa' ye, my bonny Meg,
I'ſe let a wee ſmacky fa' on you;
May my neck be as lang as my leg
if I be an ill huſband unto you.

Sae gang your way hame e'enow,
mak ready 'gin this day fifteen days,
And tell your father the news.
that I'll be his ſon in great kindneſs.

It was na lang after that,
wha cam' to our bigging but Patie,
Weel dreſt in a bra' new coat,
and wow but he thought himſelf pretty:

His bonnet was little frae new,
in it was a loop and a ſlitty,
To tie in a ribbon ſae blue,
to bab at the neck o' his coaty.

Then Patie cam' in wi' a ſtend,
ſaid, Peace be here to the bigging,
You're welcome, quo' William, come ben,
or I wiſh it may rive to the rigging.

Now draw in your ſeat and ſit down,
and tells a' your news in a hurry;
And haſte ye Meg, and be done,
and hing on the pan wi' the berry.

Quoth Patie, my news is nae thrang;
yeſtreen I was wi' his honour;
I've ta'en three rigs o' braw land,
and ha'e bun' myſell under a bonner:

And now my errand to you
is for Meggy to help me to labour,
I think you maun gie's the beſt cow,
becauſe that our haddin's but ſober.

Well, now for to help you through,
I'll be at the coſt o' the bridal,
I’ſe cut the craig o' the ewe,
that had a-maiſt die'd o' the ſide-ill,

And that'll be plenty o' bree,
ſae lang as our well is nae reiſted,
To a' our good neighbours and we,
and I think we'll no be ill feaſted.

Quoth Patie, O that'll do weel,
and I'll gi'e you broſe in the morning,
O' kaill that was made yeſtreen,
for I like them beſt in the forenoon.

Sae Tam the piper did play,
and ilka ane danc'd that was willing,
And a' the lave they ranked through,
and they held the ſtoupy ay filling.

The auld wives ſat and they chew'd,
and when that the carles grew nappy,
They danc'd as weel as they dow'd,
wi' a crack o' their thumbs & a kappie.

The lad that wore the white band,
I think they ca'd him Jamie Mather,
And he took the bride by the hand,
and cry'd to play up Maggy Lauder.