Young Jamie.
[Burns.—Tune, "The carlin o' the glen."]
Young Jamie, pride of a' the plain,
Sae gallant and sae gay a swain;
Through a' our lasses he did rove,
And reign'd resistless king of love:
But now wi' sighs and starting tears,
He strays among the woods and briers;
Or in the glens and rocky caves,
His sad complaining dowie raves.
I wha sae late did range and rove,
And chang'd with every moon my love,
I little thought the time was near
Repentance I should buy sae dear:
The slighted maids my torments see,
And laugh at a' the pangs I dree;
While she, my cruel, scornfu' fair,
Forbids me e'er to see her mair!