xii[i]. kl̅ febr̅. nat̅l̅ sce̅ agnetis uirginis.
Ambrosivs bisceop · binnan mediolana 001
afunde on ealdum bocum · be ðære eadigan agne ·
hú heo on rome byrig reðe ehtnysse acóm ·
⁊ on mægðhade martyr-dóm ðroƿode ·
Ða aƿrát ambrosius · be þam mædene ðus · 005
On þære tide ƿæs sum æðel-boren mæden · 006
agnes gehaten · on ðone hælend gelyfed ·
binnan rome byrig · bileƿit · ⁊ snotor ·
cild-lic on gearum · ⁊ eald-lic on mode ·
Seo ƿan þurh ge-leafan · ƿið þa feond-lican ealdras · 010
⁊ on ðam þritteoðan geara þone deað forleas ·
⁊ ece líf gemette · forðan þe heo lufode crist ·
Heo ƿæs ƿlitig on ansyne · ⁊ ƿlitigre on geleafan · 013
Þa ða heo geƿende of scole · ða aƿogode hi sum cniht 014
simpronies sunu · þe ƿæs ge-set ofer ða burh ·
to heah-gerefan · ⁊ ƿæs hæðen-gilda ·
Þa budon ða magas þam mædene sona 017
deorƿurðe gyrlan · ⁊ deorƿurðran behéton ·
ác seo eadige agnes · eal forseah ·
⁊ þæra maðma ne rohte · þe má þe reocendes meoxes ·
Ða brohte se cniht to ðam clænan mædene · 021
deorƿurða gimmas · ⁊ ƿoruldlice glencga ·
⁊ behét hire ƿelan gif heo ƿolde hine ·
þa andƿyrde agnes · anrædlice þam cnihte ·
Geƿít ðu fram me synne ontendnys 025
leahtras foda · ⁊ deaðes bigleafa
geƿít fram me · Ic hæbbe oðerne lufiend ·
þinne ungelican · on æðelborennysse
seðe me bead bæteran frætegunga ·
⁊ his geleafan hring me let to ƿedde ·
⁊ me gefræteƿode · mid ún-asmeagendlicra ƿurðfulnysse ·
He befeng minne sƿiðran · ⁊ eac minne sƿuran · 032
mid deorƿurðum stanum · ⁊ mid sciendum gimmum ·
He gesette his tacn · on minū nebbe · 034
ic nænne oðerne ofer hine ne lufige ·
He geglængde me mid orle · of golde aƿefen · 036
⁊ mid ormettum mynum me gefreteƿode ·
He æt-eoƿde me eac · his ænlican hordas · 038
ða he me gehét · gif ic him gelæste ·
Ne mæg ic him to teonan oðerne geceosan · 040
⁊ hine forlætan · þe me mid lufe beƿeddode ·
His ansyn is ƿlitigre · ⁊ his lufu ƿynsumre · 042
his bryd-bedd me is gearo · nu iú mid dreamum ·
His mædenu me singað · mid gesƿegum stemnum · 044
Of his muðe ic under-feng meoluc · ⁊ hunig · 045
nú iú ic eom beclypt · mid his clænum earmum ·
his fægera lichama is minum geferlæht ·
⁊ his blod ge-glende mine eah-hringas ·
His modor is mæden · ⁊ his mihtiga fæder 049
ƿifes ne breac · ⁊ him á bugað englas ·
His ƿlites ƿuldriað · þa ƿynsumū [wynsumu/n/ @ Skeat] (sic) tunglan · 051
sunne · ⁊ mona · þe middan-eard onlihtað ·
Þurh his spæc geedcuciað eac ða deadan · 053
⁊ þurh his hrepunge beoð gestrangode þa unstrangan seocan ·
His speda ne ateoriað · ne his ƿelan ne ƿaniað · 055
Þam anū ic healde minne truƿan æfre · 056
þam ic me befæste mid ealre estfulnysse ·
Þonne ic hine lufige · ic beo eallunga clæne · 058
þonne Ic hine hreppe · ic beo unƿemme ·
ðonne Ic hine under-fó · ic beo mæden forð ·
⁊ þær bærn ne ateoriað · on ðam bryd-lace ·
Þær is eacnung buton sare · ⁊ singallic ƿæstmbærnyss · 062
Se cniht ƿearð ge-ancsumod · ⁊ ƿið-innan ablend 063
æft̄ þæs mædenes spræce · þe hine spearn mid ƿordum ·
He ƿearð þa gesicelod · ⁊ siccetunga teah · 065
of niƿel-licum breoste · on bedde licgende ·
Þa cunnodan læcas hƿi he licgende ƿære · 067
⁊ cyddan þam fæder · þæs cnihtes mod-leaste ·
Þa sende se fæder sona to ðam mædene · 069
ylce ærende · þe his sunu ær abead ·
ac agnes ƿiðsoc · sæde heo nolde
þæs ærran bryd-guman æþelan truƿan ·
æfre geƿemman þurh ænig ƿedd ·
Þa þuhte ðam heah-gerefan huxlic on mode · 074
heo oþerne tealde to-foran his gebyrdum ·
befran sƿa þeah þearle mid mycelre ðrutunge ·
hƿæt se bryd-guma ƿære · þe agnes onƿuldrode ·
Him ƿearð þa gesæd · heo fram cild-hade sona 078
cristen ƿære · ⁊ sƿa mid dry-cræfte afylled ·
heo crist tealde hire to bryd-guman ·
Hƿæt ða simpronius mid sƿiðlicū gehlyde · 081
hét hí gefeccan hám to his dóm-setle ·
⁊ ærest onsundron mid gesƿæsum ƿordum ·
olehte þam mædene · ⁊ æfter ðam geegsode ·
Ac godes mæden ne mihte beon bepæht 085
þurh ænige lyffetunge fram hire leofan drihtne ·
ne heo næs afyrht · for his þeoƿ-racan ·
Þa ge-seah sympronius hyre soþan anrædnysse · 088
⁊ cydde hire freondum · heo for-scylgod (sic) ƿære
for hire cristen-dome · þe se casere onscunode
Eft þæs on mergen het se manfulla dema 091
þa eadigan agnen him to gefeccan ·
⁊ sæde hire gelome hu his sunu hí lufode ·
ac him speoƿ hƿonlice · þeah þe hé sƿiðe spræce ·
He ge-sæt þa his dom-setl · dreorig on mode · 095
⁊ behét ðam mædene menig-fealde ƿita
buton heo ƿiðsoce þone soðan hælend ·
He cƿæð æft siððan to ðam snoteran mædene · 098
Hlyst minum ræde · gif ðu lufast megð-had · 099
ðu gebuge mid biggengum · hraðe ·
to þære gydenan uesta · þe galnysse onscunað ·
Agnes ða andƿyrde · þam arleasan ⁊ cƿæð · 102
Ic for-seah þinne sunu ðe soþlice is man · 103
⁊ ic nates hƿon ne mæg on his neb-ƿlite beseon
for mines cristes lufe hu mæg ic him to teonan ·
to þam deadum anlicnyssum · me ge-eadmedan ·
Þa cƿæð se heah-gerefa · to ðam halgan mædene · 107
Ic forbær þe oð þis · forðan þe ðu gyt cild eart · 108
Þu tælst ure godas · sƿa þeah ne græma þu hí · 109
Agnes hī ⁊ƿyrde · Se ælmihtiga herað 110
sƿiðor manna mód · þonn̄* heora mycclan ylde ·
⁊ se geleafa ne bið on gearū · ac bið on glæƿum ⁊gitum ·
Læt þine godas geyrsian · gif hi aht magon · 113
Læt hi sylfe beodan ƿe us to him gebiddan · 114
gif þu þis dón ne miht · drece us loca hu þu ƿylle ·
Þa cƿæð simpronius · se sceandlica dema · 116
Geceos þe nú agnes an þæra tƿegra · 117
oððe þu mid mædenū þæra mæran uestan ·
þinne lac geoffrige · oððe þu laðum myltestrum
scealt beon geferlæht · ⁊ fullice gebysmrod ·
⁊ ða cristenan ne magon þe þonne ahreddan ·
Hƿæt þa agnes ⁊ƿyrde · mid mycelre anrædnysse · 122
gif ðu cuðest minne god · ne cƿæde þu ðas ƿord ·
Orsorhlice ic forseo þine þeoƿ-racan · 124
forþan þe ic geare cann mines drihtnes mihte ·
Ic truƿige on him forþan ðe he 126
Is me trumƿeall · ⁊ unateorigend-lic beƿerigend ·
ic ðinū aƿyrgedū godum ne ðurfe
ge-offrian · ne þurh ælfremede horƿan ·
æfre beon gefyled · mid þam fulum myltestrum ·
Ic hæbbe godes encgel haligne mid me · 131
Þine godas syndon agotene of áre · 132
of þam ðe man ƿyrcð ƿynsume fate ·
oððe hí synd stænene · mid þam þe man stræta ƿyrcð ·
Nis na godes ƿunung on ðam grægū stanū · 135
ne on ærenū ƿecgum · ac he ƿunað on heofonū ·
Þe soðlice genimð ⁊ þine gelican · 137
seo grimlice hell · mid þam grædigum fyre ·
on þam ge beoð toblaƿene · ⁊ forbyrnan ne magon ·
ac beoð æfre ge-edniƿode · ðære ecan ontendnysse ·
Þa hét se ƿoda dema hyre ƿæda of adón · 141
⁊ hí sƿa nacode gelædan · to þam forligres huse ·
⁊ hét clypian geond þa strǽt · ⁊ cyðan be þysum ·
Hƿæt ða godes miht mycclū ƿearð gesƿutelod · 144
sƿá þæs mædenes fex · befeng hi eall abutan ·
sona sƿa þa cƿelleras hire claðas of abrudon ·
⁊ fex hi behelede on ælce healfe gelice ·
Hi tugon ða mæden to þæra myltestrena huse · 148
ac heo gemette þær sona scinende godes encgel ·
sƿa nan man ne mihte for ðam mycclum leohte
hire on beseon · oððe hí hreppan ·
for þan þe ðet hus eall sceán · sƿá sƿá sunne on dæg ·
⁊ sƿa hí hí gearnlicor sceaƿodon · sƿá scimodon heora eagon sƿiðor ·
Agnes hí þa astrehte þone ælmihtigan biddende · 153
⁊ god hyre þa asende scinende tunecan
Heo þancode ða criste · ⁊ ðone clað hire onadyde · 156
⁊ ƿæs sƿiðe gemæte hire micelnysse ·
beorhte scinende · sƿa men geseon mihton ·
god hire sende þone scinende clað ·
Þa ƿearð þæra myltestrena hús mannū to gebæd-huse · 160
⁊ ælc seðe Inneode · arƿurðode god ·
for þam heofonlican leohte · þe on ðam huse scean ·
Þa com þæs gerefan suna (sic) to þære scinendan stoƿe · 163
mid his sceandlicū gegadum · ƿolde þa godes þinene gebysmrian ·
⁊ sende him sona æt-foran · sume Into hire ·
ac hí ƿundrodon sƿiðe · þæs ƿynsuman leohtes ·
⁊ ablicgede cyrdon · to heora bysmorfullum hlaforde ·
Þa ðreade he hí þearle · forðan þe hí þæs scinendan leohtes 168
sƿa sƿiðe ƿundrodon · ⁊ hí geƿemman ne dorston ·
Arn þa him sylf inn · mid sceand-licum ƿillan · 170
ac he feol astreht ætforan þam mædene adyd ·
þurh ðone deofol þe hé dƿollice gehyrsumede ·
He læg þær sƿa dæd lange on þære flora · 173
ða ƿendon his gegadan he ƿære gebysgod
embe his fracedan dæda · þa fandode heora án ·
⁊ ge-mette hine deadne · ⁊ dreorig sona clypode ·
Eala ge romanisce arfæste symle · 177
gehelpað us hraðe · þeos reðe myltestre
mid hire drycræfte adydde urne hlaford ·
Þa arn seo burh-ƿaru · ablycged þider sona · 180
⁊ se fæder eac cóm · clypigende mid gehlyde ·
Þu ƿæl-hreoƿasta ƿimman · ƿoldest ðu gesƿutelian 182
þinne feondlican dry-cræft · sƿa ðu minne sunu adyddest ·
Agnes him cƿæð tó · hƿi synd þa oðre cuce · 184
þe hider inn-eodon · buton forðon þe hí arƿurðodon
þone ælmihtigan god · þe me myld-heort-lice gescrydde ·
⁊ asende me his encgel · þe minne lichaman geheold ·
seþe ƿæs frā cyld-cradole criste gehalgod ·
Þin sceamleasa sunu · mid sceamleasum anginne · 189
arn into me · ac se encgel hine afylde ·
⁊ ðam deofle betæhte · þe hine adydde þær-rihte ·
Þa cƿæð se heah-gerefa · to ðam halgan mædene · 192
þin saga bið ge-sƿutelod · gif þu þone sylfan encgel bitst ·
hé minne ancennedan sunu · nu ansundne arære ·
Agnes seo eadige him andƿyrde þus · 195
Ne synd gé na ƿyrðe · ƿundor to geseonne · 196
ác sƿa þeah is tima · drihtnes miht beo gesƿutelod ·
Gað eoƿ nu þeah ealle út · ic mé ana gebidde · 198
Hi eodon þa ealle ut · ⁊ heo hi ana gebæd 199
biddende hire drihten he þone deadan arærde ·
Þa æteoƿde þær cristes encgel · ⁊ þone cniht arærde · 201
⁊ he arn þær-rihte ut · þa he geedcucod ƿæs ·
clypigende ofer eall · ⁊ cƿæðende þus ·
An god is on heofonū · ⁊ eac on eorðan · 204
seðe is þæra cristenra god · ⁊ eoƿer godas ne synd nahtes ·
Hi ne magon him sylfum fremian · ne oðrum fultumian · 206
Þa ƿurdon þa hæðengyldan · hetelice gedrefede · 207
⁊ clypodon mid gehlyde · be ðam geleaffullan mædene ·
Animað animað hraðe · þa reðan ƿiccan · 209
seo þe ðus aƿent þurh ƿicce-cræft manna mod ·
Þa ne dorste se heah-gerefa · naht ongean þa hæðen-gyldan · 211
ac for-lét his gingran togeanes þære ceaste ·
⁊ ferde him-sylf aƿeg · sorhful on mode ·
forðan þe hé ne mihte mæden ahreddan ·
ƿið þa hæðen-gyldan · æfter his suna æriste ·
Hƿæt þa aspasius se under-gerefa · 216
ne mihte ƿið-cƿæðan þam cƿealm-bærum folce ·
ac hét þa ontendan for þam micclum teonan ·
sƿyðe micel fyr · ⁊ hí to-middes besceofan ·
Hit ƿearð þa sƿá gedón · sƿa se ƿælhreoƿa hét · 220
ac se lig hine todælde · on tƿegen dælas sona ·
⁊ for-sƿælde þa ðe þa ceaste macedon ·
⁊ agnes seo eadige · stód on æle middan gesund ·
astræhtum handum þus hí gebiddende ·
Eala ðú ælmihtiga god · ana to ge-biddene · 225
ondrædend-lic scyppend · soþlic to ƿurðigenne ·
mines drihtnes fæder · ðe ic bletsige ·
forðan þe Ic æt-ƿand þurh þinne ƿynsuman sunu ·
þæra arleasra þeoƿracan · ⁊ eac þæs deofles fylðe ·
Efne ic eom begoten mid godcundlicū deaƿe · 230
þæs lig is to-dæled ⁊ þa geleaf-leasan forsƿælede ·
Ic bletsige ðe fæder bodigendlic god · 232
ic þurh fyr unforht to ðe faran mót ·
ic gelyfde ic geseo ·
ðæt ic gehihte · ic hæbbe nú ·
Þe Ic andette mid muðe · ⁊ mid minre heortan · 236
⁊ mid eallum innoðe · ic þe geƿilnige ·
ænne soðne god · þe mid þinum suna rixast ·
⁊ mid þam halgan gaste · ⁊ ælmihtig god æfre ·
Þæt fyr ƿearð þa acƿenced · þær an col ne gleoƿ · 240
⁊ folc tealde to dry-cræfte
grymetende mid gehlyde · grame to feore ·
Ða ne mihte Aspasius þa micclan ceaste acuman · 243
ac hét hí acƿellan · mid cƿealm-bærum sƿurde ·
⁊ crist hí ða underfeng · for his naman gemartyrode ·
Se fæder · ⁊ seo modor · mid mycelre blysse · 246
gelæhton hyre líc · ⁊ gelæddon to heora agenum ·
⁊ hi ðær bebyrigdon · buton sarnysse ·
⁊ þær gelome ƿacodon · ƿurðigende þa stoƿe ·
Þa on sumere nihte gesaƿon hí cuman 250
mycel mædenlic ƿerod · ⁊ agnes tomiddes ·
Hi ƿæron ealle ge-glengede mid gyldenum gyrlum · 252
⁊ mid ormætum leohte arƿurðlice ferdon ·
Þa cƿæð seo halige agnes to hire magum ðus · 254
Ƿarniað ge ne ƿepon me sƿa sƿa deade · 255
ác blyssiað mid me · Ic eom þysū mædenum geferlæht ·
⁊ ic mid him under-feng · sƿiðe fægere ƿununga ·
⁊ ðam ic eom on heofonū geþeodd · þe ic her on eorðan lufode ·
Æfter þysum ƿordum heo geƿende forð mid þam mædenum · 259
Þa ƿearð þeos gesihþ · sƿiðe geƿidmærsod · 260
Hit gelamp ða siððan æfter lytlum fyrste · 261
on þæs caseres dagum · þe constaninus hatte ·
sume menn sædon þa gesihþe his dehter
constantia gehaten · seo ƿæs hæðen þagit ·
heo ƿæs sƿa þeah snotor · ⁊ sƿyðe unhál ·
⁊ on eallum limum egeslice ƿunda hæfde ·
Þa ðohte heo · heo ƿolde ƿacian ane niht 267
æt agnes byrgene · biddan hire hæle ·
Heo com þa þider þeah þe heo hæðen ƿære · 269
⁊ mid geleaf-fullum mode · to ðam mædene clypode ·
þe ða byrgene ahte · heo hyre hæle forgeafe ·
Heo ƿearð þa on slæpe · ⁊ on sƿefne geseah 272
þa eadigan agnen · þas ƿord hire secgende ·
Ongin anrædlice ðu æðele constantia · 274
⁊ gelyf ðæt se hælend þe ge-hælen mæge ·
ðurh þone þu scealt underfón · ðinra ƿunda hæle ·
Þa aƿóc constantia · ⁊ ƿæs sƿá ge-hæled · 277
on hire lice næs gesyne · aht þæra sarra ƿunda ·
Heo ferde ða hál hám to hire fæder · 279
⁊ hine geblyssode · ⁊ hire gebroðra ·
⁊ ealle ða hired-menn · for hire hæle blyssodon ·
⁊ se hæðen-scipe ƿanode · ⁊ godes geleafa ƿeox ·
Heo ƿearð þa gefullod · sƿá sƿá hire fæder ƿæs · 283
⁊ hadunga under-feng · mid fægere drohtnunga ·
⁊ manega oðre mædenu · þurh hire mærlican ge-bysnunga ·
forsaƿon ƿoruld-lustas · ⁊ ƿurdon criste gehalgode ·
Ða bæd constantia · constantinum hire fæder · 287
he þære eadigan agne · ane cyrcan arærde ·
⁊ hire sylfre ane ðrúh · þær hét gesettan ·
Þes hlisa asprang þa on eallum ðam leod-scipe · 290
⁊ coman fela untrume to þære halgan byrigene ·
⁊ ƿurdon gehælede · þurh ða halgan agnen ·
Þa romaniscan mædenu manega eac ðurh-ƿunodon 293
on clænum mægðhade · for cristes lufe ·
æfter agnes gebysnunga þe þær bebyrged ís ·
alia sententia quam scripsit terrentianvs. 296
On ðam dagum ƿæs svm heretoga gehaten gallicanus ·
sigefæst on gefeohtum · ⁊ ful leof þam casere ·
for his micclan sige · þeah þe he nære gefullod ·
Se aƿogode constantian þæs caseres dohtor 299
on þære tide · þe ða scyðiscan sƿiðe ƿunnon ƿið hine ·
ƿearð þa se casere for þære ƿogunge astyrod ·
ƿiste seo dohtor · þe drihten hæfde gecoren ·
hraðor ƿolde sƿeltan þonne ceorlian ·
Þa geseah seo dohtor · hire fæder gedrefednysse · 304
⁊ cƿæð him ðus to · mid clænum inge-hyde ·
Ic ƿát god nele me næfre forlætan · 306
Aƿurp þine ymbhydig-nysse · ⁊ behát me þam heretogan · 307
he me underfó · æfter ðam ge-feohte ·
siððan he ða scyððiscan mid sige ofer-ƿinð ·
For þysum behate · ic ƿille habban his dohtra · 310
attican ⁊ arþemian · to minre geþeodnysse ·
oð uncre gifta · gegearcode beon ·
Hæbbe he mid him forð to þære fyrdincge · 313
Iohannem · ⁊ paulum · mine ða ge-treoƿostan ·
hi mine þeaƿas magon him secgan ·
⁊ ic ðurh his dohtra his þeaƿas oncnaƿe ·
Hit ƿearð sƿa gedón · heo ða dohtra under-feng · 317
⁊ se heretoga ferde mid þære fyrdincge ·
þa gebæd constantia hí to gode sona
mid mycelre onbryrdnysse he hire bena gehyrde ·
Eala ðu ælmihtiga god · þe for agnes ðingunga · 321
þines mæran martyres · minne hreoflan gehældest ·
⁊ me sylfre gesƿutelodest · þinne soðan lufe ·
⁊ þu behete us · on þinum halgan godspelle ·
Soð ic eoƿ secge · eoƿ sylð min fæder · 325
sƿa hƿæs sƿa ge hine biddaþ · her on minum naman ·
Ic bidde ðe min drihten ðu þas mædenu · þe gestryne · 327
⁊ heora fæder gallicanum · þe me ƿile þe beniman ·
geðeod to clænnysse þines geleafan ·
Geopena heora heortan earan to þære halƿendan lare · 330
hí þe anne lufian · ⁊ eorðlice ðing ne geƿilnion ·
⁊ mid beornendre lufe · to þinum brydbedde becumen ·
Æfter þysum gebede gebugon ða mædenu 333
to ðam halgan fulluhte ær se fæder come ·
⁊ ƿurdon gehadode to þæs hælendes clænnysse ·
Þa com gallican eac to gode gebogen · 336
⁊ hine gebæd sona mid soðum geleafan ·
æt þæs halgan petres stoƿe þe stent binnan rome ·
Hine ƿylcumede se casere · ⁊ cƿæð him to mid blysse · 339
Þa ða þu to þam gefeohte ferdest · þu offrodost þam fulum deoflum · 340
⁊ nu ðu sigefæst come · þu ge-bæde þe to criste ·
⁊ to his apostolum · cyð me hu hit sy ·
Þa aléat gallicanus · to ðam geleaf-fullan casere · 343
⁊ sæde be endebyrdnysse hu he beah to gode ·
Þa scyððiscan þeoda ofslogan ure fela · 345
⁊ ic ƿearð belocen on anre lytlan byrig ·
mid hƿonlicum fultume · ⁊ ƿe feohtan ne dorston ·
ongean ðone ormæstan here · he (sic) hæfde þa burh beseten ·
Þa offrode Ic gelome mine lác þam godum · 349
oþ mine geferan me ⁊ hí betæhton ·
ðam onƿinnendum feondum · ⁊ ic ða fleames cepte ·
Þa cƿædon ða cristenan · Iohannes · ⁊ paulus · 352
Behát þam heofonlicum gode · ðu to him gebuge · 353
gif he þe nu gehelpð · ⁊ þu hæfst sige ·
Ic ða sona behét · sƿá sƿá þa halgan me tihton · 355
⁊ me com þær-rihte to · godes encgel mid rode ·
het me niman min sƿurd · ⁊ siðian mid him ·
Ic him fyligde ða · ⁊ fela englas coman 358
on manna gelicnyssum · mærlice geƿæpnode ·
gehyrton me mid ƿordum · ⁊ heton me gán forð ·
oð ƿe becoman þær se cyning ƿæs ·
He feoll ða afyrht · to minum fotum astreht · 362
Þa gebundon ða godes cempan · bardan þone cynincg · 363
⁊ his tƿægen suna · ⁊ betæhton hí me ·
Ne sloh ic nænne · ne of-slean ne hét · 365
Nu is þin land gehealden ⁊ þa leoda þe onbugað · 366
Ealle ða heafod-menn þe to me gebugan · 367
mid heora cempum · ic gebigde to criste ·
Ða oðre ic forseah þe sƿa dón noldon · 369
Ic sylf eom sƿa cristen · ic gecƿæð on behate · 370
ic heonan-forð nelle habban ƿifes gemanan ·
find me nu æfter-gencgan · ic gode mæge þeoƿian ·
on soðre æƿfæstnysse sƿá ic þam ælmihtigan behét ·
Þa beclypte se casere ðone godes cempan · 374
⁊ sæde hu his dohtra drihtne þeoƿdon ·
⁊ his tƿa gesƿustra eac siððan gelyfdon ·
Þa eodon hí to healle · ⁊ seo halige helena cō 377
mid ðam fore-sædum mædenum · micclum blyssigende ·
hi þurh-ƿunodon on mægð-hade · mǽrlice drohtniende ·
oð þæt [sic @ Skeat] hi geƿiton of ƿorulde to criste ·
Gallicanus þa freode fif þusend manna · 381
⁊ mid æhtum ge-ƿelgode ⁊ ƿædlum todælde
his manig-fealdan ƿelan · ⁊ geƿende him þanon ·
to sumum halgan ƿere · se hatte hilarian ·
mid sumum his mannum · þe hine ne mihton forlætan ·
Feoƿer land he forgeaf forð In mid him 386
æþeodigum to ⁊fencge · ⁊ to ælmes-dædum ·
Þa asprang his ƿord ƿide geond land · 388
hu se mære man manna fét aðƿoh ·
⁊ ƿæter bær to handum · ⁊ mid ƿistum þenode ·
He ƿearð ða sƿa halig · he gehælde untrume · 391
⁊ sƿa hraðe sƿá he beseah · on ða ƿit-seocan menn ·
sƿa ƿurdon hí aclænsode · frā þam unclænan gastum ·
Eft ða þa iulianus se arleasa ƿiðersæce · 394
ƿearð to casere gecoren · þeah þe he ƿære to preoste bescoren ·
Þa sette hé geban · sƿa sƿa he ƿæs bealƿes full · 396
ða cristenan nahton nan þincg on ƿorulde ·
adræfde þa gallicanū þone godes man aƿeg ·
⁊ he ferde to alexandrian þære ægiptiscan byrig ·
ƿende siððan to ƿestene · ⁊ ƿæs ðær ancra ·
oð sum hæðen-gylda · hine ðær ofsloh ·
forþan þe he nolde þam fulū godum geoffrian ·
⁊ he sƿa mid sige · siþode to criste ·
Eft iulianus se ylca ƿiðersaca ƿolde gebigan · 404
þa halgan gebroðra · Iohannem · ⁊ paulū · to his hæðen(-)gilde ·
ac þaða hé ne mihte þa mæran godes ðegnas
to his hirede aspanan · ne to his hæðenscipe · geƿeman ·
þa sende he him to sumne hæðenne ƿer ·
terrentianus gehaten · se hæfde mid him
ane gyldene anlicnysse · ⁊ cƿæð to ðam godes mannum ·
Ure hlaford Iulianus · het eoƿ ge-biddan 411
to þyssere anlicnysse · oððe ic inc begen ofslea ·
Þa cƿædon þa halgan · ne cunne ƿe nanne god · 413
buton fæder ⁊ sunu · ⁊ þone halgan gast ·
þyssere halgan ðrynnysse hæfð þin hlaford ƿiðsacen ·
⁊ ƿile oðre geƿeman mid him to forƿyrde ·
Hƿæt ða terrentianus · het þa tƿægen gebroðra 417
digellice beheafdian · ⁊ on heora huse bebyrigan ·
Þa ƿearð iulianus · for his ƿælhreoƿnysse 419
sona þæs ofslægæn · þurh scā* marian hæse ·
⁊ cristen-dom ƿæs þeonde · ⁊ þa halgan ƿurdon gecydde ·
sƿa ƿode menn · ƿurdon gehælede ·
on ðam ylcan huse · þe þa halgan onlagon ·
⁊ terrentianes sunu · mid sƿeartum deofle afylled ·
arn to heora byrgenum · egeslice ƿedende ·
⁊ se fæder sona gesohte þa byrigena ·
⁊dette his synne he ofsloh ða halgan ·
⁊ ƿearð gefullod · ⁊ his suna ƿittig ·
þam hælende to lofe · þe leofað á on ecnysse · Amen.