———
THE
SEQUEL.
NOW loving friends I hae you left,
Ye ken I neither stole nor reft,
But when I found mysell infeft
In a young Jack,
I did resolve to change the haft
For that mistak.
An’ reasons mae I had anew,
For I had neither horse nor cow ;
My stock took wings an’ aff it flew;
Sae a’ was gone,
An’ deil a flee had I was new,
Except young John.
Too aft my thirsty-throat to cool,
I went to visit the punch bowl,
Which makes me now wear reddish wool
Instead o’ black;
Or I must foot the cutty-stool
Wi’ deil a plack.
The chappen stoup, the pint an’ gill,
Too aft I caused for to fill,
Ay loving those wha wou’d sit still,
An’ wet the mouth,
Ne’r minding that the Tullo-hill,
Leads people south.
O but that loving laird Kingswells,
My blessings flow where his foot swells,
Lang life to him whate’er befals,
God be his guide,
He’s cur’d a thousand thirsty sauls,
An’ mine beside.
O had I but thae days again,
Which I sae freely spent in vain,
I’d strive some better for to ken,
What future chance
Shou’d blaw me here out o’er the main,
And sae near France.
But since what ails maun ay befal
The chiel that will be prodigal;
When wasted to the very spaul
He turns his tusk,
For want o’ comfort to his saul,
On hungry husk.
Now since I’m aff sae mony a mile,
There’s naething got without some toil,
I’ll wait; cross fortune anes may smile,
Come want, come wealth,
An’ tak a pint in the mean while,
To Heilden’s health.
Sae, for a time, friends, fare ye weel
My pot companions, true an’ leel,
I wish you a’ a merry Yule.
Much mirth an’ glee,
Nae mair young Jacks into the creel
That day for me.
Some ither Yule may yet cast up,
When we again shall meet,
To drown our sorrows in a cup,
In case we live to see’t.
THE END
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse