THE BRAW WOOER.
Ae day a braw wooer cam down the lang glen,
And sair wi' his love he did deave me-
I said there was naething I hated like men,
The deuce tak the lad to believe me, believe me.
The deuce tak the lad to believe me.
He spak o' the darts o' my bonny black een,
And vow'd for my love he was dying;
I said he might die when he liked, for Jean,
The Lord forgie me for lying, for lying,
The Lord forgie me for lying.
A weel-stocked maiden, himsel for the laird,
And marriage aff-hand was his proffer;
I never loot on that I ken'd it or car'd,
But thought I might get a waur offer, waur offer,
But thought I might get a waur offer.
But what do ye think, in a fortnight or less,
The deil tak his taste to gae near her!
He up the lang loan to my black cousin Bess,
Guess ye how, the jade! I could bear her, could bear her,
Guess ye how, the jade! I could bear her.
But a' the neist ouk as I fretted wi' care,
I gaed to the tryste o' Dalgarnock,
And wha but my braw fickle wooer was there,
I glowr'd as if I'd seen a warlock, a warlock,
I glowr'd as if I'd seen a warlock.
But owre my left shouther I gae him a blink,
Lest neebors might say I was saucy;
My wooer he caper'd as he'd been in drink,
And vow'd I was his dear lassie, dear lassie,
And vow'd I was his dear lassie.
I speer'd for my cousin fu’ couthy and sweet,
Gin she had recover’d her hearin’,
And how my auld shoon fitted her shauchl’t feet,
But preserve us! how he fell a swearin', a swearin',
Preserve us! how he fell a swearin.
He begged for gudesake I wad be his wife,
Or else I wad kill him wi' sorrow;
So just to preserve the puir body in life,
I think I will wed him to-morrow, to-morrow.
I think I will wed him to morrow.
Public domainPublic domainfalse