77
Curriculum Vitae.
In Hibernia Idibus Septembris 1863 in regione quæ vulgo Duthaig Poerach de Desibus Muman nuncupatur Ædibus manorialibus de Mount Bolton patre Perso de Henebre matre Eblina ni Chassin natus sum. Postquam domi elementis institutus sum parvam scholam primum Carrigæ Siuiræ deinde Cluain móræ tum Portcladaci adii. Hisce in disciplinis puerilibus decem annis consumptis Portlárgiam (Waterford) me contuli ut litteris humanioribus per biennium incumberem. Tum alumnus Collegii Sti. Joannis eadem in urbe ascriptus sum easdemque ad litteras per unum annum me applicui, et examine facto electus sum ut sumptibus publicis in Collegio S. Patricii apud Mag-Nuadat studia prosequerer. Hic septem persolvi annos quorum unum ad humaniora studia, ad philosophiam tum physicam tum metaphysicam duos, ad theologiam, Sacram Scripturam, grammaticas Hebraicas, studia affinia, quatuor me adhibebam. Nec tamen hisce temporibus neglexi litteras aut Anglicas aut Gadelicas quas utpote bilinguis ab ineuenti aetate usurpavi. Mense Junii 1892 sacris initiatus ut munere sacerdotali Mancuniæ (Manchester) fungerer in Angliam transfretavi. Hic Joanne Strachan in Universitate Victoriana professore, viro doctissimo atque humanissimo familiariter usus sum eundemque per quadriennium de Sanscritis, Celticis litteris audii. Mense Aprili 1895 professor litterarum Celticarum Universitatis Catholicæ apud Washington in America designatus, præside Senatus auctore ad Germaniam transii ubi per quatuor semestria, quorum duo Friburgi, Gryphiæ duo, persoluta, studiis operam dabam.
Friburgi hi viri clarissimi me docuerunt:
Holtzmann, Kalbfleisch, Kluge, Levy, Puchstein, Schröer, Thumb,
Thurneysen, Weissenfels.
Item Gryphiæ:
Heller, Konrath, Siebs, Zimmer.
