Page:Alloway Kirk or Tam o Shanter a tale and man was made to mourn a poem with a sketch of burnss life.pdf/14

14

That at the L—d’s, even on Sunday,
Thou drank wi' Kirkton Jean till Monday.
She prophesied that, late or soon,
Thou wad be found deep drown’d in Doon,
Or catch’d wi’ warlocks in the mirk,
By Aloway’s auld haunted Kirk.—

AH, gentle dames! it gars me greet,
To think how many counsels sweet,
How many lengthen’d, sage advices,
The husband frae the wife despises¹

But to our Tale; Ae market-night,
Tam had got planted unco right;
Past by an ingle, bleezing finely,
Wi’ reamig swats, that drank divinely;
And, at his elbow, Souter Jonny,
His ancient, trusty, drouthy crony;
Tam lo’ed him like a vera brither;
They had been fou for weeks thegither:
The night drave on wi' sangs and clatter,
And aye the ale was growing better:
The Landlady and TAM grew gracious,
Wi’ favours, secret, sweet, and precious;
The Souter tauld her queerest stories,
The Landlords laugh was ready chorus:
The storm without might rair and rustle,
TAM didna mind the storm a whistle.—

Care, mad to see a man sae happy,
E’en drown’d himself amang the nappy;
As bees flee home wi’ lades o’ treasure;
The minutes wing’d their way wi’ pleasure