[Fol. 213, v°.]
To multiplie vertegrece. Tak a pound of fyn vertegrece of Spayne, and breko it to poudre on a ston, and with that poudre medle another pounde of fyn lymayle[1] of coper, with good vynegre that be strong in manere of nosche, pappe[2]; thanne take al that matere so medlid and put it in a clos erden pot, and stoppe it wel and clos, and sete it in hot hors-dungge, bynethe, above, and al aboute, and let it stonde so to the lemaile of coper be al turnyd into Vertegrece, as is the other of Spayne that is medled therwith; and whanne it so is, tak it out and medle it aȝeyn with more lymayl of coper, and with. more vynegre, in manere bifore seid. And on this manere thou myȝt multeplie evermore; for wete wel that this is kyndely therfore, and of his owen rote that he cometh first of, and therfor this the beste maner of multeplyinge of vertegrece that is, for it is ful fyn and faire.
[Fol. 215, v°.]
For to make glas nesche[3]. Take the gotes blode, lewke, and the juse of senevey, and boile hem wel togederis, and with tho tweye materes boyle wel thi glas, and thi glas schal bycome nesche as past, and if it be cast aȝeyne a wal it schal not breke.
For to make fyn azure withoute past. Take and grynde salarmonyak on a marbel ston, and put it to dissolve, and thanne take lapis lazuli the ston al hol, and make it reed hoot in the fire, and al hot qwenche it in the water, and lat it reste awhile thorynne, and it schal be smal and fyn of colour; after wasche the salt clene fro the colour with faire comoun water, etc., thanne drye it up with the sonne or with a cler smal fire, and thanne put it up.
Lapus lazuly, that be a fyne blew colour, and with many strakes of gold schewinge ther among as it were strakes on a towche, and also loke that if ther be in the ston as litil gravel schewing in colour as whit, for if ther be the ston is not fyn. Also loke wel evermore if thu schalt bye eny manere of lapis lazuly, and it have not withynne him many smale specklez as it were golde, loke that thu bye it not bi no manere of wey; but if thu assay it first er than thu bye it with the moste verrey assay that longith therto; thus thu schalt assaye it: Tak a ston therof, and make it reed hoot in the fire, as it were reed glowyng yren, and thanne tak it out and lat it kele bi itself on a clene tyle, and whanne it is cold if it be fynere of colour and as hard as it was bifore thanne it is lapis lazuli; and whanne the ston is cold, if he turne eny thing blak liche syndre, and that it be more brokel than it was bifore, triste wel that it is not lapus lazuly, but it is lapis almanie, of whiche men maken a blewe bize azure.
On this manere thu myȝt make azure bis. Take and grynd faire poudre of whit leed, or of ceruse, on a marble ston with the juse of a blewe flour that groweth in corn in somer, and lat it drie up, and thanne grynd aȝeyn with more juse of the blewe flour, and drye it aȝeyn, and thus grinde it and drie it evermore to the colour be as fyn as thou wilt have it; for wite wele the ofter that it is so grounde with juse of the blewe flour and dried after, the more fyn of colour wole it be whanne it is al maad. t. wright.
