cumpaignye ove lur larcin chivaucherent de Lappeleye tant qe a la priorie de Bythebury, e le dit sire Robert vynt a la prioresse e ly pria del houstel pur la dite cumpaignie qe furent gentz nostre segnur le Rey moud travailles, les quels debruserent les huy . . . des graunges en la dite priorie e pristrent feyn et aveigne a lur volente countre le gre la dite prioresse e demorerent illeqes tote cele nuyt. E sire le garsun le dit William qe feust a large les pursuy de loyns e aytant sur eux vynt au baillif errant nostre segneur le Rey en le counste Destafford a Lychfelde fesaunt entendant a ly qe les ditz larouns ov lur larcin furent a Blythebury. Par quei le dit bailliff prist olly gentz de Lichefeld e sen ala e trova illeqes les avantditz larons ove lur larcin avantdit, e le dit baillif comanda au ditz larouns qe cux rendisisent a la pees nostre seyneur le Roy, ils sei rendre ne voleyent, eyns se tournerent a defense e seterent au dit baillife e as autres gens e naffrerent plusours de eux. Mes au darrein les avantditz larons sei mistrent a la fute e le dit baillif e ses gens freschement pursuerunt les ditz larons e les . . . atre de ditz larouns pristerent fuantz e les decolerent. E sire le dit baillif lur chastels illeqes . . . . de lour larcin prist en sa garde al oeps nostre segneur le Roy e fust en alant ove sa cumpaynie vers Lichfield e vynt le dit sire Robert qe avoit relye les uns des ditz larons e sire Wauter de Rideware e plusours autres olly entre Blythebury e petit Rideware de denz la dite fraunchyse del avant dite evesqe, e sur le dit baillife fesoint refons countre la pees e les ditz chatels cest asavoir chivals armures especerie e mercerie a la value suys dit pristerent e enporterent. E sire le jeudy proschein suant le jour de les avantditz William e Richart viendrent a Estafford daver feat lour demonstrance de lours perte e damage quils avomt resceu sire illeqes furent a les portes genz de la meintenance les ditz larons e ne voleint suffrir les avant ditz William ne Richard entrer e le arke un de ses cumpaignons couperent . . a peyne saunz grevure mal eschaperent. E sire les avant ditz William e Richart e plusours gentz de la ville de Lichfield sount menace des ditz larons e lour meintenours quils nosent nule part aler hors de la dite ville. De quei sire se vous plest pur Deux veuller ordiner vos premereines assecions a Lichfield si a la veryte des choses suisdites veullet ateindre desicome les felonies suisdites se firent dedens la dite fraunchise. E sire pur Deux voillet ordiner qe deus homes gens ou chivalers on autres bons e leals soient eslu e jure de eslyre une bone enqueste, qar si la dite enqueste seit eslu par baillif a peyne si vous ateindret la verite des choses suys dites. Sire de eyde e remedie de cestes choses prient les ditz William e Richart pour Deux.
A lur segneur le counte de Arundel.
