( 112 )
E'er since they laid that curst restriction On Aquavitae; And rouse them up to strong conviction, And move their pity.
Stand forth, and tell your Premier Youth, The honest, open, naked truth: Tel him o' mine and Scotland's drouth, His servants humble: The muckle devil blow ye south, If ye dissemble.
Does ony great man glunch and gloom, Speak out, and never fash your thumb, Let posts or pensions sink or soom Wi' them wha grant 'em, If honestly they canna come, Far better want 'em.
In gath‘rin votes you were nae slack, Wow stand as tightly by your tack; Ne'er claw your lug, and fidge your back, And him and haw, But raise your arm, and tell your crack Before them a'.
Paint Scotland greeting owre her thrissel, Her matchkin stoup as toom's a hissel, And damn'd Excisemen, in a bussel, Seizin a Stell, Triumphant, crush'nt like a mussel, Or lampit-shell.
