Page:Beowulf (Wyatt).djvu/59

sēcean wyn-lēas wīc;⁠wiste þē geornor,
þæt his aldres wæs⁠ende gegongen,
dōgera dæg-rīm.⁠Denum eallum wearð
æfter þām wæl-rǣse⁠willa gelumpen.
825Hæfde þā gefǣlsod,⁠sē þe iǣr feorran cōm,
snotor ond swȳð-ferhð⁠sele Hrōðgāres,
genered wið *nīðe;⁠niht-weorce gefeh,Fol. 148a.
ellen-mǣrþum.⁠Hæfde East-Denum
Gēat-mecga lēod⁠gilp gelǣsted,
830swylce oncȳþðe⁠ealle gebētte,
inwid-sorge,⁠þe hīe ǣr drugon
ond for þrēa-nȳdum⁠þolian scoldon,
torn unlȳtel.⁠Þæt wæs tācen sweotol,
syþðan hilde-dēor⁠hond ālegde,
835earm ond eaxle⁠(þǣr wæs eal geador
Grendles grāpe)⁠under gēapne hr[ōf].^[1]

XIII.

Ðā wæs on morgen,⁠mīne gefrǣge,
ymb þā gif-healle⁠gūð-rinc monig;
fērdon folc-togan⁠feorran ond nēan
840geond wīd-wegas⁠wundor scēawian,
lāþes lāstas.⁠Nō his līf-gedāl
sārlīc þūhte⁠secga ǣnegum,
þāra þe tīr-lēases⁠trode scēawode,
hū hē wērig-mōd⁠on weg þanon,
845nīða ofercumen⁠on nicera mere,
fǣge ond geflȳmed,⁠feorh-lāstas bær.

1. 836. MS. defective at edge. Cf. l. 926.