Page:Beowulf (Wyatt).djvu/70

beloren lēofum⁠æt þām lind-plegan,^[1]
bearnum ond brōðrum;⁠hīe on gebyrd hruron
1075gāre *wunde;⁠þæt wæs gēomuru ides.Fol. 153b.
Nalles hōlinga⁠Hōces dohtor
meotod-sceaft bemearn,⁠syþðan morgen cōm,
ðā hēo under swegle⁠gesēon meahte
morþor-bealo māga,⁠þǣr hē[o]^[2] ǣr mǣste hēold
1080worolde wynne.⁠Wīg ealle fornam
Finnes þegnas,⁠nemne fēaum ānum,
þæt hē ne mehte⁠on þǣm meðel-stede
wūg Hengeste⁠wiht gefeohtan,
ne þā wēa-lāfe⁠wīge forþringan
1085þēodnes ðegne;⁠ac hig him geþingo budon,
þæt hīe him ōðer flet⁠eal gerȳmdon,
healle ond hēah-setl,⁠þæt hīe healfie geweald
wið Eotena bearn⁠āgan mōston,
ond æt feoh-gyftum⁠Folcwaldan sunu
1090dōgra gehwylce⁠Dene weorþode,
Hengestes hēap⁠hringum wenede,
efne swā swīðe⁠sinc-gestrēonum
fǣttan goldes,⁠swā hē Frēsena cyn
on bēor-sele⁠byldan wolde.
1095Ðā hīe getrūwedon⁠on twā healfa
fæste frioðu-wǣre;⁠Fin Hengeste
elne unflitme⁠āðum *benemde,Fol. 154a.
þæt hē þā wēa-lāfe⁠weotena dōme
ārum hēolde,⁠þæt ðǣr ǣnig mon
1100wordum ne worcum⁠wǣre ne brǣpe,
ne þurh inwit-searo⁠ǣfre gemǣnden,
ðēah hīe hira bēag-gyfan⁠banan folgedon

1. 1073. MS. ‘hild’; emended for the alliteration.
2. 1079. MS. ‘he.’