Page:Black-bird.pdf/6

6

Twine weel the Plaiden.

O I hae lost my silken snood,
 that tied my hair so yellow!
I’ve gi’en my heart to the lad I lo’ed,
 he was a gallant fellow.
And twine it weel, my bonny dow,
 and twine it weel, the plaiden;
The lassie lost her silken snood,
 in puing of the bracken.

He prais’d my een, sae bonny blue;
 sae lilly-white my skin O;
And syne he prie’d my bonny mou’,
 and said it was nae sin O.
And twine it weel, my bonny dow,
 and twine it weel the plaiden;
The lassie lost her silken snood,
 in pu’lng of the bracken.

But be has left the lass he lo’ed,
 his ain true love forsaken,
Which gars me sair to greet the snood,
 I lost among the bracken.
And twine it weel, my bonny dow,
 and twine it weel, the plaiden;
The lassie lost her silken snood,
 in pu’ing of the bracken.