¶Breſt federys. Plumage. Barbe federys. Pendaunt federys.
The federis abowte the foꝛmore paꝛteys of an hawke: becalled the breſt feederis, ⁊ the feederis vnd the wynges are plumage The federis vndeꝛ the beke be calde the baꝛbe federis. And the federis that bene at the Joynte: at the hawkes kne thay ſtonde hangyng and ſhaꝛppe at thendes, thos be calde the pendaunte federis.
¶Flagg oꝛ faggis federys.
The federis at the wynges next the body be calde the flagg oꝛ the fagg federis.
¶Beme federes of the wyng Sercell
And the long federis of the wynges of an hawke bene calde the beme federis of the wyng. And the federis that ſum call the pynyon fedeꝛ, of a nodeꝛ fowle, of an hawke: it is calde the Seꝛcell ¶And ye ſhall vndeꝛſtonde iff an hawke be in mewe yf ſame ſeꝛcell fedeꝛ ſhall be the laſt fedeꝛ that ſhe will caſt, and tyll that be caſt, ſhe is neueꝛ mewed, yit it has bene ſeen: that hawkes haue caſt that ſame fiꝛſt, as I haue heꝛde ſay, bot that otheꝛ Rewle is gendrall, and whan ſhe hath caſt hiꝛ ſeꝛcellis in mew, then and not eꝛſt it is tyme foꝛ to fede hiꝛ with waſh meete and to begynne to enſayme hire.
¶Enſayme
Enſayme of an hawke is the grece, and bot if that be take away with fedyng of waſh meete and otheꝛwyſe as it ſhall be
