and ſhe eſkape that yere, with good fedyng ſhe is likly to endure longe.
¶To Reclayme an hawke.
Iff ye will Reclaym yowre hawke ye moſt depaꝛte oon mele in iij. melis, vnto tyme that ſhe will come to Reclayme, and whan ſhe will come to Reclayme encrece heꝛ melis eueꝛy day betteꝛ and betteꝛ. And oꝛ ſhe come to the Reclame make heꝛ that ſhe ſowre not. Foꝛ thogh ſhe be wele Reclaymed hit may happyn that ſhe will ſowre: ſo hegh in to the Eyre, that ye ſhall Netheꝛ ſe hiꝛ noꝛ fynde hiꝛ.
¶And iff yowre hawke ſhall flie to the paꝛtrich, looke that ye Enſayme heꝛ oꝛ ſhe flie, whetheꝛ be Brawncheꝛ oꝛ Eyes Oꝛ mewed hawke.
¶why an hawke is called an Eyes.
An hawke is calde an Eyes of hiꝛ Eyghen, foꝛ an hauke that is broght vp vndeꝛ a Buſſaꝛd oꝛ a Puttocke: as mony be: hath wateri Eyghen. For whan thay be diſcloſed and kepit in feꝛme tyll thay be full ſummyd, ye ſhall knawe theym by theyꝛ watꝛri Eyghen. And alſo hiꝛ looke will not be ſo quycke as a Brawncheris is, and ſo be cauſe the beſt knawlege is by the Eygh, they be calde Eyeſes.
