Page:Burns' popular songs (1).pdf/12

12

I hae a Wife o' my ain.

I hae a wife o' my ain—
I'll partake wi' naebody;
I'll tak cuckold frae nane,
I'll gie cuckold to naebody.
I hae a penny to spend,
There—thanks to naebody;
I hae nathing to lend,
I'll borrow frae naebody.

I am naebody's lord—
I'll be slave to naebody;
I hae a guid braid sword.
I'll tak dunts frae naebody.
I'll be merry and free,
I'll be sad for naebody;
If naebody care for me,
I'll care for naebody.

---

Up in the Morning early.

CHORUS
Up in the morning's no for me,
Up in the morning early,
When a' the hills are cover'd wi' snaw,
I'm sure its winter fairly.

Cauld blaws the wind frae east to west,
The drift is driving sairly
Sae loud and shrill I hear the blast,
I'm sure its winter fairly.
The birds sit chittering in the thorn,
A' day they fare but sparely;
And lang's the night frae e'en to morn—
I'm sure it's winter fairly.