The secund reule. There buthe perilous daies in the yeere which Senct Johan, evangeliste in the Ile of Pathimos (sic), in the whiche daies every man schuld shonys to make matrimonye or bygynne eny longe viage or foundement of eny other grete worke other of eny other grete doynge. The dayes hereof buthe marked in the monthes aforesaid at the signe made overe this processe.
The IIIde rule. There buthe xxviij daies in the yere that ho so in wiche zif eny mann bygynnethe eney jorney, hit ys happylich zif he evere cometh agen, and ho so ever bygynnethe to take eny sikenesse hit ys wondere zif he evere recovere. And ho evere be weddyd in eny of tho daies, hit spedethe not well. And ho so evere ys bore in eny of thulke dayes happlych he lyvethe not longe. The daies of these perilis buthe marked in the monthes aforwrite at the syne overe this processe.
The IIII. rule. The Mondayes in the yeere buthe in the whiche hit ys weel perilous to eny mann or womann or beste to blede for unnethe or nevere he schall schape, but that he schall be dede therby, but the more speciall grace of God lette hit, as by the marke of this processe in the monthes afore.
The V. rule. There buthe iij perilous Mondaies in the yeer as clerkes seien. That the child that ys bore in eny of hem, he schall be brende or droynt or deye sudeignely or somme other foule dethe. And if hit be a maide child, hit schall become a lyzt woman of hure body and therto badde but zif God lette hyr.
Also zif eny mann ete of eny goos fleshe in tho dayes his ys drede leste he take the fallyng evyl therof.
Hit is not profitable to bygynne eny grete worke or grete jornay in eny of thes iij dayes. And they buthe marked in the Kalender afore in Feverer, May and Septembre by the signe overe this processe.
The best dayes of every month in yeer to bygynne eny gode worke or take eny jornay ys the fyrste day, the iij, vj, vij, xiiij day.
Explicit.
Wytheinne haven. Wher so evere hit be one the prym eve, the spryng ys at the hyest. And be hit atte the morow tyde ar at the eve tyde that he be atte the hyest, thukke same daye sevenyzt at the same tyde, hit bygynnethe to springe.
