a grete wynde which made the shyppe to arryue at the porte of Rome. When Alexis sawe this, anone he sayd to hymselfe, By the grace of god I wyl charge no man of Rome, I wyl go to my faders hous in suche wyse as I shal not be beknowen of ony person. And when he was within Rome he mette Eufemyen his fader which came fro ye palays of ye emperours wh a grete meyny[1] followynge hym. And Alexis hys sone a poore man ranne cryenge and sayd. Sergeaunt of god haue pyte on me that am a poor pylgrym, and receyve me into thy hous for to haue my sustenaunce of ye relefe yt shall come fro thy horde, that god [may] blysse the, and haue pyte on thy sone, which is also a pylgrym. Whan Eufemyen herde speke of his sone, anone his herte began to melt and sayd to hys servauntes, Whiche of you wyl haue pyte on this man, and take ye cure and charge of hym. I shall deliver hym from hys servage and make him free, and shall gyve hym of myn herytage. And anone he commysed[2] hym to one of his servauntes, and commaunded yt his bedde sholde be made in a corner of ye hall, whereas comers and goers myght se hym. And the servaunt to whom Alexis was commaunded to kepe made anone his bedde under the stayr and steppes of the hall. And there he lay right like a poore wretche, and suffred many vylanyes and despytes of the servauntes of his fader, which oft tymes cast and threwe on hym ye wasshynge of disshes and other fylth, and dyd to hym many euill turnes, and mocked hym, but he neuer complayned, but suffered all pacyently for the loue of god. Finally whan he had ledde this right holy lyfe whin his faders hous in fastynge, in prayenge, and in penaunce by the space of vij yere, and knewe that he sholde soon dye, he prayed the servaunt yt kepte hym to gyve hym a pece of parchement and ynke. And therein he wrote by ordre all hys lyfe and how lie was maryed by the commaundement of his fader, and what he had sayd to hys wife, and of the tokens of hys rynge and bocle of hys gyrdell, that he had gyuen to her at his departynge, and what he had suffered for goddes sake. And all this dyd he for to make his fader to understande that he was his sone. After this whan it pleased god for to shewe and manyfest the vyctory of our lorde Jesu Christ in his servaunt Alexis. On a tyme on a sondaye after masse herynge all the people in the chirche, there was a voyce herde from god cryenge and sayenge as is sayd Mathei undecimo capitulo. Come unto me ye that labour and be trauayled, I shall comfort you. Of which voyce all the people were abasshed, whiche anone fell downe unto the erth. And the voyce sayd agayne. Seche ye the servaunt of god, for he prayeth for all Rome. And they sought hym, but he was not founden.
¶ Alexis in a mornynge on a good frydaye gaue his soul to god, and departed out of this worlde. And ye same daye all the people assembled at Saynt Peters churche and prayed god yt he wolde shewe to them where the man of god myght be founden yt prayed for Rome. And a voyce was herde that came fro god that sayd. Ye shall fynde him in the hous of Eufemyen. And the people said unto Eufemyen, Why hast thou hydde fro us, thou hast suche grace in thy hous. And Eufemyen answered. God knoweth that I knowe no thynge therof.
