his āncennedan Sunu, þæt nān ne forwurðe þe on hine gelȳfð, ac hæbbe þæt ēce līf.[1]
17. Ne sende God his Sunu on middanearde þæt hē dēmde middanearde, ac þæt middaneard sȳ gehǣled þurh hine.[2]
18. Ne biþ þām gedēmed ðe on hine gelȳfð; sē ðe ne gelȳfð, him biþ gedēmed, for þām þe hē ne gelȳfde on ðone naman þæs āncennedan Godes Suna.[3]
19. Þæt is sē dōm, þæt lēoht cōm on middaneard, and menn lufedon þȳstro swȳþor ðonne þæt lēoht: hyra weorc wǣron yfele.[4]
20. Ælc ðāra þe yfele dēð hatað þæt lēoht, and hē ne cymþ to lēohte, þæt his weorc ne sȳn gerihtlǣhte.[5]
21. Witodlīce sē ðe wyrcð sōðfæstnesse cymp tō ðām lēohte, þæt his weorc sȳn geswutelude, for ðām þe hig synt on Gode gedōne.[6]
22. Æfter þyson cōm sē Hǣlend and his leorningcnihtas tō Iudea lande, and wunode ðǣr mid him, and fullode.[7]
23. And Iohannes fullode on Enon wið Salim, for ðām þe þǣr wǣron manega wætro; and hī tōgædere cōmun, and wǣron gefullode.[8]
- ↑ Corp., ancennendan, A, B, C, ancennedan; A, forweorðe.
- ↑ A, on myddaneard; A, sig, B, C, þurg.
- ↑ Corp., gelyf, A, C, gelyfð, B, Se þe ge ne lyfð; Corp., acennendan, A, B, C, acennedan.
- ↑ A, B, C, men; A, Heora.
- ↑ A, þæra yfele (om. þe).
- ↑ B, C, cymd; A, geswutelode; A, synd.
- ↑ A, þyssum; A, wunede þar.
- ↑ A, þar; A, wætera; A, comon.
