Page:Gospel of Saint Matthew in West-Saxon.djvu/43

wun windas, and āhruron on þæt hūs, and þæt hūs fēoll, and hys hryre wæs mycel.

Ðys [godspel] sceal on þone þryddan sunnandæg ofer epiphaniam.

28. Þā wæs geworden, þā sē Hǣlend þās word geendode, þā wundrode þæt folc his lāre.

29. Sōþlīce hē lǣrde swylce hē anweald hæfde, and nā swā swā hyra bōceras and sundorhālgan.^[1]

CAPUT VIII

1. Sōþlīce þā sē Hǣlend of þām munte nyþer āstāh, þā fyligdon him mycle mænio.^[2]

2. Þā genēalǣhte ān hrēofla tō him, and hine tō him geēaðmēdde, and þus cwæð, Drihten, gyf þu wylt, þū miht mē geclǣnsian.^[3]

3. Ðā āstrehte sē Hǣlend hys hand, and hrepode hyne, and þus cwæð, Ic wylle; bēo geclǣnsod. And hys hrēofla wæs hrædlīce geclǣnsod.^[4]

4. Ðā cwæð sē Hǣlend tō him, Warna þē þæt þū hyt nǣnegum men ne secge; ac gang, ætēowe þē þām sācerde, and bring hym þā lāc þe Moyses bebēad, on hyra gecȳðnesse.^[5]

1. A, heora; A, sunder-.
2. Corp., hælnd, A, B, hælend; A, mycele.
3. A, geeadmedde.
4. A, hrepede; A, beo þu.
5. A, ætywe; A, -nysse.