Page:Humorous poems.pdf/20

20

When Vulcan gies bis bellows breath,
And ploughmen gather wi' their graith,
O rare! to see thee fizz and freath
I' the ludgit caup!
Then Burnewin comes on like death
At every chaup.

Nae mercy, then, for airn or steel;
The brawnie, banie, ploughman chiel,
Brings hard owrehip, wi' sturdy wheel,
The strong forehammer,
Till block and study ring and reel,
Wi' dinsome clamour.

When skirlin weanies see the light,
Thou maks the gossips clatter bright,
How fumblin cuifs their dearies slight,
Waeworth the name!
Nae howdie gets a social night
Or plack frae them.

When neebors anger at a plea,
And just as wud as wud can be,
How easy can the barley bree
Cement the quarrel!
It's aye the cheapest lawyer's fee
To taste the barrel.

Alake! that c'er my Muse has reason
To wyte her countrymen wi' treason!
But monie daily weet their weason
Wi' liquors nice,
And hardly, in a winter's season,
E'er spier her price.