18. [Be ceorliscum ðeofum gefangenum.]
Cierlisc mon gif he óft betygen wære, gif he æt siðestan sie gefongen, slea mon hond oððe fot [of].
19. [Be cinges geneate.]
Cyninges geneat gif his wer bið twelfhund scilL, he mot swerian for syxtig hida, gif he bið huslgengea.
20. [Be feorran cumenan men.]
Gif feorcund mon oððe fremde butan wege geond wudu gonge ⁊ ne hrieme ne horn blawe, for ðeof he bið to profianne, oððe to sleanne oððe to áliesanne.
21. [Be swa ofslagenes mannes were.]
Gif mon ðonne þæs ófslægenan weres bidde, he mot gecyþan, þæt he hine for ðeof ofsloge, nalles þæs ofslegenan gegildan ne his hlaford.
§ 1. Gif he hit ðonne diemeð, ⁊ weorðeð ymb long yppe, ðonne rymeð he ðam deadan to ðam aðe þæt hine moton his mægas unsyngian.[1]
22. [Be ðam þe mannes geneat stalige.]
Gif ðin geneat stalie ⁊ losie ðe, gif ðu hæbbe byrgean mana þone þæs angyldes; gif he næbbe, gyld ðu þæt angylde, ⁊ ne sie him no ðy ðingodre.
23. [Be ælðeodiges mannes slæge.]
Gif mon elðeodigne ófslea, se cyning ah twædne[2] dǽl weres þriddan dæl sunu oððe mægas.
§ 1. Gif he ðonne mægleas sie, healf kyninge, healf se gesið.
§ 2. Gif hit ðonne abbod sie oððe abbodesse, dælen on þa ilcan wisan wið þone kyning.
§ 3. Wealh gafolgelda CXX scill., his sunu C, ðeowne[3] LX, somhwelcne fiftegum;[4] Weales hyd twelfum.[5]
