Demon. I am ȝour lord Lucifer, that out of helle cam,
Prince of this werd, and gret duke of helle.
Wherefore my name is clepyd Sere Satan,
Wheche aperyth among ȝow a matere to spelle.
I am norssher of synne to the confusyon of man,
To bryng hym to my dongeon ther in fyre to dwelle.
Ho so evyr serve me, so reward hym I kan,
That he xal syng weleaway ever in peynes ffelle.
Lo! thus bountevous a lord than now am I,
To reward so synners, as my kend is;
Whoso wole folwe my lore and serve me dayly,
Of sorwe and peyne anow he xal nevyr mys.
ffor I began in hefne synne for to sowe,
Amonge alle the angellys that weryn there so bryth;
And therfore was I cast out into helle ful lowe,
Notwythstandyng I was the fayrest and berere of lyth.
ȝet in drowe in my tayle of tho angelys bryth;
With me into helle takyth good hed what I say;
I leste but tweyn aȝens on to abyde there in lyth,
But the iij.^{de} part come with me, this may not be seyd nay.
Takyth hed to your prince than, my pepyl everychon,
And seyth what maystryes in hefne I gan ther do play;
Page:Ludus Coventriae (1841).djvu/259
This page needs to be proofread.
XXV. THE COUNCIL OF THE JEWS.