5
But ha'flins frank, and ha'flins shy,
For twa three minutes, may comply,
While modestly she'll act wi' caution,
Say ay or no, an' watch his motion,
An' mark the slee occasion weel
To slip into his pouch the Pill,
Then rise wi' seeming indignation,
And leave him to his meditation,
Sae, he'll beleve she disna prize him
But scorns his flight, an can' despise him
"Now Nanse, if Bess by my direction,
Gang thro' this plot wi' circumspection,
I spae, yell soon gie me a ca
To tell me he's your son in-law,"
Nanse wi' the pill gade happy hame,
Gaed it to Bess—laid down the scheme
An Bess determin'd to gang through it,
Tho' she shou'd ever after rue it.
Soon after this there was a weddin',
At it threescore at least paradin';
Bess was amang them buskct braw,
False-hearted Davie, Nanse and a';
An', Nota Bene, I declare,
The pill incog, was also there.
Bess banish'd grief, an rous'd her spirit
She once so happy did inherit,
Firmly determin'd if she cou d,
To jundish Davie in the crowd.
When ilk ane in the merry meeting
Had crammd their kytes wi' dainty eating,
The young folks on the floor did striddle,
An' cut their capers to the fiddle,
Alternate join'd the bowl an glasses,
To drink and crack, baith lads and lasses,
An' Bess, I trow, might bauldly boast,
That night she was the greatest toast,
For wi' the chiels she gat nae slackin',
For dancin, walkin', an for crackin.
