Page:Stevenson - The Merry Men (1905).djvu/27

This page has been proofread, but needs to be validated.
15
THE MERRY MEN

the back-side of her is clear at hie-water o' neaps. But, man! the dunt that she cam' doon wi' when she struck! Lord save us a'! but it's an unco life to be a sailor—a cauld, wanchancy life. Mony's the gliff I got mysel' in the great deep; and why the Lord should hae made yon unco water is mair than ever I could win to understand. He made the vales and the pastures, the bonny green yaird, the halesome, canty land—

And now they shout and sing to Thee,

For Thou hast made them glad,

as the Psalms say in the metrical version. No that I would preen my faith to that clink neither; but it's bonny, and easier to mind. 'Who go to sea in ships,' they hae't again—

                       And in
      Great waters trading be,
Within the deep these men God's works
      And His great wonders see.

Weel, it's easy sayin' sae. Maybe Dauvit wasnae very weel acquant wi' the sea. But, troth, if it wasnae prentit in the Bible, I wad whiles be temp'it to think it wasnae the Lord, but the muckle, black deil that made the sea. There's naething good comes oot o't but the fish; an' the spentacle o' God riding on the tempest, to be shüre, whilk would be what Dauvit was likely ettling at. But, man, they were sair wonders that God showed to the Christ-Anna—wonders, do I ca' them? Judgments, rather: judgments in the mirk nicht among the draygons o' the deep And their souls—to think o' that—their