Page:Tales of my landlord (Volume 2).djvu/167

consideration, "I see but ae gate for't, and that's a cauld coal to blaw at, mither. Howsomever, mither, ye hae some guess o' a wee bit kindness that's atween Miss Edith and young Mr Harry Morton, that suld be ca'd young Milnwood, and that I hae whiles carried a bit book or maybe a bit letter quietly atween them, and made believe never to ken wha it cam frae, though I kenn'd brawly. There's whiles convenience in looking a wee stupid—and I hae aften seen them walking at e'en on the little path by Dinglewood-burn; but naebody ever kenn'd a word about it frae Cuddie; I ken I'm gay thick in the head, but I'm as honest as our auld fore-hand ox, puir fallow, that I'll ne'er work ony mair—I hope they'll be as kind to him that come ahint me as I hae been.—But, as I was saying, we'll awa down to Milnwood and tell Mr Harry our distress. They want a ploughman, and the grund's no unlike our ain—I am sure Mr Harry will stand my part, for he's a kind-hearted