But that deil o' a lassie has wiled me—
She's witched me as sure as I'm born,
Wi' the glamour o' love she's beguiled me,
Sae I'm to be married the morn.
Married at last the morn—
Buckled sae fast the morn;
Wi' the glamour o' love she's beguiled me,
Sae I'm to be married the morn.
Already the lassie can guide me
To gae or to come at her ca',
Then what may I guess to betide me
Whan she rules wi' baith love an' the law;
But gudesake! it canna be helpit,
To mak' her my ain I ha'e sworn—
At the kirk a' the parish was tellt it,
Sae I'm to be married the morn.
Married at last the morn—
Buckled sae fast the morn;
At the kirk a' the parish was tellt it,
Sae I'm to be married the morn.
An' noo sin' it canna be better
We'll e'en mak' the best o't we can,
An' sin' for a wife I maun get her,
She just maun get me for a man;
We dinna ken what was intended—
We maybe for this o't were born;
An' noo, folk, my sang maun be ended,
For I'm to be married the morn,
Married at last the morn—
Buckled sae fast the morn;
An' noo, folk, my sang maun be ended,
For I'm to be married the morn.
Jeannie's Bosom.
[This is a brief but emphatic burst of enthusiasm from Burns regarding his "bonnie Jean." It appears in the Museum to an old air communicated by the poet.]
Louis, what reck I by thee,
Or Geordie on his ocean?—
Dyvour, beggar loons to me—
I reign in Jeannie's bosom.
Let her crown my love her law,
An' in her breast enthrone me:
King and nations—swith, awa'!
Relf randies, I disown ye!
Young Jamie.
[Burns.—Tune, "The carlin o' the glen."]
Young Jamie, pride of a' the plain,
Sae gallant and sae gay a swain;
Through a' our lasses he did rove,
And reign'd resistless king of love:
But now wi' sighs and starting tears,
He strays among the woods and briers;
Or in the glens and rocky caves,
His sad complaining dowie raves.
I wha sae late did range and rove,
And chang'd with every moon my love,
I little thought the time was near
Repentance I should buy sae dear:
The slighted maids my torments see,
And laugh at a' the pangs I dree;
While she, my cruel, scornfu' fair,
Forbids me e'er to see her mair!
As I cam' down.
[Burns says that this song was very popular in Ayrshire. He sent a copy of the words and music to Johnson for insertion in his Museum.]
As I cam' doun by yon castle wa',
And in by yon garden green,
O there I spied a bonnie, bonnie lass,—
But the flower borders were us between.
A bonnie, bonnie lassie she was,
As ever mine eyes did see:
O five hundred pounds would I give,
For to have such a pretty bride as thee.
To have such a pretty bride as me,
Young man, ye are surely mista'en;
Though ye were king o' fair Scotland,
I wad disdain to be your queen.
Talk not so very high, bonnie lass,
O talk not so very, very high;
The man it the fair that wad sell,
He maun learn at the man that wad buy.
I trust to climb a far higher tree,
And harry a far richer nest:
Tak' this advice o' me, bonnie lass,
Humility wad set thee best.
