Page:The booke of thenseygnementes and techynge that the Knyght of the Towre made to his doughters - 1902.pdf/133

And for the grete Ioye that they toke therof they made festes and Ioustynge to be cryed, and sente for alle the grete lordes and ladyes of the lond. The feste was nobly and rychely hold, for there lacked no thynge plente of sylke, and clothe of gold was there abrode. Al the palays resowned of the sowne of the instrumentes that were there, and the Ioustynge and tornoyeng was fayre to see, for the knyghtes ranne eche one vpon other, lyke in a batayl; grete solas and ioye was there. But al this displeased to god, and by his prouydence and wylle, as they were in suche balances, theyr child deyde. And whanne the dethe of hym was knowen thurgh al the Courte, the joye and myrthe was soone falle doune, and tourned or become in to grete trystesse and sorowe, and departed and wente ageyne euerychone to theyr places heuy and sorowfull. And therfor this is a moche good ensample how men ought not to reíoyse them to moche whan god sendeth to them children, for oftyme hit displeaseth god, whiche soone taketh therfore his yeft ageyne fro them.