mysdone vnto her, that she myght neuer pardonne ne forgyue her with her good wyll. Thenne the holy man began to put forthe & shewe vnto her by fayr wordes & ensaples, how Ihesu Cryst forgaaf & pardonned his dethe. Also he reherced to her thexample of a knyghtes sone, whos fader had be slayne. This knyghtes sone came to an heremyte and confessyd hym, and as he came to the synne of yre he sayd that he myght neuer pardonne ne forgyue to hym that had slayne his fader. And the holy heremyte shewed hym how god forgaf his dethe, and many other ensamples he dyd shewe vnto hym. And so moche he sayd that by his swete and fays wordes the child pardonned and forgaf his fader's dethe with good wylle, in suche wyse that whanne the child cam to knele before the crucyfyxe, he[1] enclyned his heed toward hym, and a voys was herd whiche sayd, "By cause that thow hast pardonned humbly for the loue of me, I pardonne and forgyue to the al thy synnes and mysdedes, and thow shalt haue grace to come to me in to the celestyal ioye." This parson or curate thenne shewed and told this ensample with many other to the sayd Burgeis, but for none ensample ne for no thynge that he couthe saye or doo she wold neuer forgyue her euylle wylle, but in that estate she deyde, wherof hit befelle that atte nyght 2 vysyon came to the sayd curate or parson by the whiche vysion he sawe how the deuyls bare away with them the sowie of the sayd burgeys, & how she had vpon her herte a grete tode; & as the mornyng cam somme came and told hym how she was passyd oute of this world. And also came to hym her children and her parentes to speke with hym for her buryenge and enterement, and that she myghte be buryed within the chirche. But the preest ansuered to them that she shold not be buryed in none holy erth, by cause she wold neuer pardonne ne forgyue to her neyghbour, and that she was dede in dedely synne, wherfore the Frendes and parentes of her dyd stryue with hym. And thenne
- ↑ I.e., the Crucified.
