¶ The tenthe fable is of the asse and of the lyon
He grete callers by theyr hyghe and
lowd crye ſuppoſen to make folke
aferd / As recyteth this fable / Of
an aſſe whiche ſomtyme mette
with a lyon / to the whiche the
aſſe ſayd / lette vs clymme vpon the montayne /
and I ſhalle ſhewe to the / how the beeſtes ben
aferd of me / and the lyon beganne to ſmyle /
and he anſuerd to the aſſe / Goo we my broder /
And whan they were on the top of the hylle /
the aſſe byganne to crye / And the foxe and
hares beganne to flee / And whanne thaſſe ſaw
them flee ſayd to the lyon / Seeſt thow not how
theſe beeſtes dreden and doubten me / and the
lyon ſayde / I had ben aſo[errata 1] ferdfull of thy voys /
yf I had not knowen veryly that thow arte but
an aſſe / ¶ And therfore men nede not doubte
ne drede hym that auanceth hym ſelf for to do
that that he may not doo / For god kepe the
mone[errata 2] fro the wulues / Ne alſo men nede not
doubte a foole for his menaces / ne for his hyghe
crye