Page:The fables of Aesop, as first printed by William Caxton in 1484, with those of Avian, Alfonso and Poggio. Vol 2.djvu/158

 

get to hit / For the whiche I wylle not that thow ete me here in the waye for the grete vergoyne and ſhame that therof myght come to me / But I pray the / and Inſtantly requyre the / that thow wylt here my counceylle / whiche is / that we two go in to the foreſt / and thow ſhalt bynde me by thy breſte / as thy ſeruant / And I ſhalle bynd the by thy neck as my mayſter And thow ſhalt lede me before the in to the wood where ſomeuer thow wylt / to the ende that more ſecretely thow ete me / to the whiche counceylle the wulf acorded and ſayd / I wylle wel that it be donne ſo / ¶ And whanne they were come in to the foreſt / they bounde eche other in the maner as aboue is ſayd / ¶ And whanne they were wel bounden / the wulf ſayd to the Aſſe / goo we where thow wylt / and goo before for to ſhewe the waye / And the aſſe wente before and ledde the wulf in to the ryght waye of his mayſters hows / ¶ And whanne the wulf beganne to knowe the way / he ſayd to the aſſe / we goo not the ryght way / to the whiche the aſſe anſuerd / ¶ My lord ſaye not that / For certaynly / this is the ryght wey / But for alle that / the wulf wold haue gone backward / But neuertheleſs the aſſe ledde hym vnto the hows of his mayſter / ¶ And as his mayſter and alle his meyny ſawe how the Aſſe drewe the