Page:The fables of Aesop, as first printed by William Caxton in 1484, with those of Avian, Alfonso and Poggio. Vol 2.djvu/205

 

the dyssymylacion of his archer / anſwerd not / And ſoo they rode forthe ſo longe that they fond yet another Ryuer   And thenne the Archer demaunded of his lord / Is this the ſame hit / Nay ſayd the knyght / but ſoone we ſhalle come therto / O my lord I ſaye ſo by cauſe that the Foxe wherof I ſpak to yow this daye / was not gretter than a ſheep / ¶ And when they had ryden vnto euen tyme they fond a grete Ryuer and of a grete brede / ¶ And whan tharcher ſawe hit / he began al to ſhake for fere / and demaunded of his lord / My lord is this the Ryuer / Ye ſayd the knyght / O my lord I enſure you on my feythe / that the Foxe of the whiche I ſpake to daye / was not gretter than the Foxe / whiche we ſawe to day / wherfore I knowlege and confeſſe to yow my ſynne / ¶ And thenne the knyght beganne to ſmyle / and ſayd to his Archer in this manere / Alſo this Ryuer is no wors than the other whiche we ſawe to fore and haue paſſed thurgh them / And thenne the archer had grete vergoyne and was ſhameful / by cauſe that he myght no more couere his leſynge / And therfore hit is fayre and good for to ſaye euer the trouthe / and to be trewe bothe in ſpeche and in dede / For a lyer is euer begyled / and his leſynge is knowen and manyfeſted on hym to his grete ſhame & dommage